Ba ai jamin ka iing bishar ia u suba nongtuh ATM ba shyrkhei

Jowai, 18 Jylliew:
Ki pulit ka West Jaintia Hills District kila kyndit kumba iuh tdong bsien hadien ba ka iing bishar ka la ai jingjamin noh mar mar wanrah ia u wei na ki suba nongialam ka kynhun nongtuh ATMs ha ka jylla ia uba ki pulit ki la iohkem hynnin shiteng miet.
Ka iing bishar jong u Chief Judicial Magistrate (CJM) ka la ai jamin ia u Hassen Ali uba shah thwet jur ha ki pulit ka East bad West Jaintia Hills, East Khasi Hills bad ruh ha ki Ribhoi Police halor ka jingdonkti jong u ban ialam ia ka kynhun tuh ATMs.
Ia utei u Hassen Ali la iohkem da ki Pulit West Jaintia Hills hadien ba la thwet bun bun bnai hynnin ka meit na kawei ka iing sah wai jong u kaba don ha Dkhiah West. Ka khubor pulit ka la iathuh ba hadien ba ki pulit WJH ki la ioh jingtip tikna ba utei u snar nongtuh u la don ha katei iingsah wai jong u, ki la leit ban kerkut bad kem ia u.
Hynrei ynda ki pulit ki la poi ha katei ka jaka la lap ba ka iing ka khang tala na sha bar. “Ki pulit ki tikna ba u don hapoh iing bad ha ka jingdonlang ki pulit na Khliehriat bad u Rangbah shnong ka Dkhiah West, ki la pynpait ia u Tala ban ban ioh rung shapoh katei ka iing ba u sah wai”, la ong ka tyllong khubor.
“Ki pulit ki dap da ka jinglyngngoh kaba khraw hadien la pynpait ia u tala bad ioh rung ha iing, kila lap tang ia ka lok jong u, ka Anjura Khatoon. Katei ka lok jong u ka la iathuh ba um don satia”. La bynrap ka tyllong khubor. Ha kaba khadduh, ki pulit ki la ioh ban kem ia u napoh Atoskhanna bad la wanrah ia u sha Jowai.
Mynta ka sngi hadien ba ki pulit kila pyndep lut nadong shadong katkum ka ain, ki la ialam ia utei uba shah kynnoh sha ka iing bishar u CJM.
Mar mar na ka liang u CJM u la rai ban ai jamin ia utei u suba nongtuh da kaba phah soi ia ka PR Bond.
La iathuh naka liang u CJM u la kynnoh ba ki pulit kim iaid satia katkum ka ain ban kem ia utei u briew. Katkum ka kyndon 41 CrPC ki pulit ki la dei ban ai jingtip shwa ia u ha shwa ba kin kem ia u namar ka dei ka kes kaba la pynngat ia u katkum ka kyndon 380 IPC kaba ka jingpynsaja ka long hapoh 7 snem.
“Hynrei kaba phylla ka long ba u CJM um shym la kynmaw ia katei ka kyndon ha kaba iadei bad ka jingshah kem uwei u suba nongtuh uba la tip kyrteng kum u Choi Kyndait na ka shnong Khliehtyrshi”, la kynnoh ka tyllong khubor”, la kynnoh ka tyllong khubor.
Ha ka 12 tarik une u bnai, ki pulit ka WJH ki la kem iaChoi Kyndait bad la pynngat ia u ha ka section 380 IPC, kaba dei ka juh ka section kaba la pynngat ia u Hassen Ali. Ia u Hassen Ali la ai jamin mar mar hapoh ka kyndon 41 CrPC katba ia u Choi Kyndait pat la thep sha along Jowai District Jail bad haduh mynta u dang don ha katei ka jail.