T.16 hajar tam kamai ki bar jylla Bengali, tang da kaba die synduk kot

Shillong:Da ki phew tylli ki longïing, bym dei trai muluk ne trai jylla; mynta la kumba 8 haduh 9 bnai ki la wan sha Nongbah Shillong ban kamai da kaba die ïa ki kot rben, synduk kot ba la bret bad ban lum ban lang ïa ki manla ka sngi na Nongbah Shillong bad khamtam eh na ki dukan heh.

Kitei ki longïing bar jylla, kiba dei ruh ki Bengali ki wan sha Shillong na Assam bad wanrah lang ruh bad la ki khun ki kti ban ha katto katne ki shnong ka Nongbah Shillong.

Katkum ka jingïathuh jong ki ha u nongthoh khubor ki la ïathuh ba ki wan sha Shillong na Assam ka shnong Barpeta, Mongoldoi bad kidei ruh kiba dang shu wan sah shen, ki wan ruh kumba 5 jur, kaba mut 5 ïing ne tam.
Kitei ki longïing Bengali, ki bym kwah ïathuh kyrteng ki la ong ba ki shait wan sha Shillong ha ki por 2 haduh 3 baje mynstep da ki kali ba ki la pynbeit bad ki ju leit phai shnong pat ha ki por mynsngi.

Haba kylli balei ba ki wan kamai sha Shillong, ki la jubab ba ki im kyrduh bad duna ka bylla bad bun ki jingeh ki hap mad ha Assam.
“Ha Shillong ka kamai ruh kaba bun bad ka kam ruh kaba suk bad sting” ong kawei na ki riew kynthei bengali haba kren bad u nongthoh khubor da kaba bynrap ba ka kam ba ki kamai dei kaba shu lum ban die ki kot rben bad synduk kot ba la jot ne ba la bret na ki dukan manla ka sngi, haba ki pynpoi mar dangstep.
Haba kylli pat shaphang katei ka ka kamai kaba ki ju leh manla ka sngi, ki la ïathuh ba ki kham ïoh jingim namar lah ban die T. 9 shi kilo bad shi sngi ym duna ïa ka 60 kilo ki ïoh ban die bad ki ju poi kum ha Ïewduh, police bazaar naduh ki por 7 ne 8 baje mynstep.

Haba kylli shano ki shait sah manla ka sngi, kitei ki riew kynthei bengali ki la ïathuh ba don kiba sah ha Themetor, Ïew Mawlong, don kiba sah ha Mawbah bad don ruh sha Jhalupara.
Haba kylli ha kano ka rukom ki shait siew bai ïing bad katno ka dor, ki don kiba la ïathuh ba kum ha Themetor ka ïing kaba rit kam duna ïa ka T. 4 hajar shibnai bad katei ka dor ka ïa synriem ruh sha kitei kiwei pat ki shnong.
Ha kawei pat ka liang, haba ïadei bad katei ka kamai kaba ki leh manla ka sngi khlem shuti, lehse laitnoh tang ha ka pang ka shitom, kitei ki bar jylla Bengali ki kamai ym duna ïa ka T. 16 hajar tam eiei shi bnai, bad kadei ruh ka bylla ne kamai ka bym donkam pynlut, hynrei tang ban shu khlong bad shu rah beit sha la shnong.