Ka Synjuk ki Nongsynshar Shnong Mawthadraishan

Nongkasen:Ka jingïa kynduh lang jong ki katto katne ki Sordar jong ki Shnong kiba hap hapoh ka Maw thadraishan C&RD Block, kaba la long mynta ka sngi ha ïingdorbar Shnong Nongkasen, ka la rai ban thaw noh ïa ka Synjuk ki Nongsyn shar Shnong Maw thadraishan Block.

Ka jingthmu jong kane ka Synjuk ka long ban wanrah ïa ka mynsiem ka jingïatreilang hapdeng ki Shnong kiba don hapoh ka Mawthadraishan Block naduh ka roi par, ka suk ka saiñ bad kiwei kiwei de ki jingdonkam jong ki paid nong shong shnong. Ha kajuh ka por kane ka Synjuk ka la rai ruh ban peitngor ruh ïa ka jingdon ki bor kiba ïaleh ban pyntroiñ ne pyntlot bor ïa ki Dorbar Shnong.

Hapoh ka Mawthadraishan Block, ki don haduh kumba shispah tam ki Shnong bad kadei kawei na ki Block kiba dang sahdien ha kiba bun ki liang. Kane ka Synjuk kan trei na ka bynta kumno ban nang kyntiew shuh shuh ïa kane ka thaiñ ha ki liang bapher bapher.
Ha kane ka jingïalang namar ba ki Sordar kim shym la ïa poi lut, la thung Adhoc President ïa u Sordar Kynshi Mawria, u Bah Powell Sohkhlet bad Adhoc Secretary ïa u Sordar Nongkasen, Bah Bleater K Budnah.

Ïa kiwei kiwei pat ki nongkitkam bad ki dkhot jong ka Executive Committee yn sa jied ha ka General Meeting kaba la buh ban pynlong ha ka 17 tarik u Nohprah 2021 ha Hall jong ka Mawthadraishan Block, Nongshillong ha ka por 11 baje mynstep.
Ka Synjuk ka kyrpad ïa ki Sordar baroh jong ka Block ban ïa poi lang sha katei ka jingïalang, ha kaba yn ïapyrkhat ruh ban thaw ïa ka Riti treikam jong ka Synjuk, ka Moto, u Logo bad kiwei kiwei de ki kam.