Dawa mait kyrteng ka Congress, ia ki 12ngut ki MLA

Ka jing iakhun ki politician, ka ju long ka drama kaba heh bad kaba itynnad shi katdei ban peit bad ha kane ka kynti, ngi iohi, ia ka drama, kaba la shna da U Mukul Sangma lem bad ki 11ngut ki MLA, kiba bud ha syndah jongu, ban thaw ia ka All India Trinamool Congress (AITC) ha ka jylla bad nangta, sa ka jing ujor ka seng Congress, sha u lamphang dorbar, ia kitei ki 12ngut, ha ka ain kyntiap seng bad kaba dawa ban mait kyrteng ia kitei ki MLA.

Ka jing ujor ka seng Congress, ka don la ka jong ka daw, ha kaba iadei bad kitei ki 12ngut; hynrei lada iakren ia ki kam thombor jong ka seng Congress, ha ka sain hima sima jong ka jylla, ki dei ki bym don kyntien shuh ban iakren bad ia kata, la ju kynmaw bha, ha ki sien 80-90, ba katei ka seng, ka jynrat dyngkhong ia kiba bun ki MLA, MDC bad ka dei lyngba jong katei ka seng, ba ki sa jan duh jait ki seng trai ri, lada dei ka UDP ne ka HSPDP nalor kiwei kiwei.

Ha ka jingtlot bor kynmaw, ngi la dei ban ia ring jingmut sha ka jingshah mait kyrteng ki 5ngut ki MLA ha u snem 1992, ha kaba U Bah PR Kyndiah, u pynhap sorkar jrain ia U Bah BB Lyngdoh bad ki seng trai ri, ki shah jynrat jubor na ka sorkar ha katei ka por; nangta wan ka sorkar.
Ym tang katta, ngi dang kynmaw ruh ia ka jingshah jynrat jubor ka sorkar U Bah EK Mawlong, halor ka nongrim jong ka Meghalaya House, ha kaba la thaw ia ka sorkar NCP, ba la ia don bynta lang U Dr FA Khonglam bad U Bah DD Lapang, ha u snem 2001 bad nangta sa ka sorkar U Dr Donkupar Roy, ha u snem 2008, ha kaba ki la jynrat ia u (tang hapoh shisnem), bad hadien kata, ki sa thaw biang ia ka sorkar Congress hi bad ki shu pyn kylla trailer ia ka seng UDP.

Kitei ki long khyndiat tylli ki nuksa, kiba ka seng Congress, ka ju ioh thaw sorkar na kyrpong iing, namar ba kam pat ju jop dalade hi, ha kiba bun bah ki elekshon, hynrei, ka shu shim kabu, da kaba thied briew hadien ka thep vote bad nangta sa ka jing pynjari President’s Rule, haba kam lah bor ban knieh, da ka lynti kaba dei.
Mynta kito ki lyer iewbih, ki la sdang kylla iew tung bad haba ki 12ngut ki MLA, ki la mih noh jyndat, na katei ka seng, kumta, ka la sngew bynnud bad ka sdang ban wad daw, hynrei, hap ban pynkut, ba ka politics, ka sdang bad ka kut ha ki kam shim kabu suda.