Mynta yn ialeh biang ka Meghalaya pyrshah ia ka Manipur ha ka Cooch Behar Trophy U-19

Shillong:Ha ka sngi ba nyngkong jong ka Cooch Behar Trophy U-19 ba la ialeh ha Bhubaneshwar mynnin ka sngi, ka Meghalaya ka la dei ban bteng biang ia ka jingleh kai ha ka sngi babud sa kumba 111 run hadien ba ka Meghalaya ka la jop ia ka toss bad jied shuwa ban kawang bad ap bol shuwa bad ha kane ka kylla step jong ka inning ba nyng kong, ka Manipur ka la tied 197 bad khyllem lut batoh ki wicket katba ka Meghalaya ka dang lah ban tied shuwa tang 86/6.

Haba phai sha ka Manipur, ha kaba sdang la iohi kumba ka la don ha ka jingma da ka jing khyllem kloi jong ki wicket da 33/4 hadien ba u Bharat Gurung u la lah ban weng 3 ngut ki nong tied ha ka sien kawang kaba saw tylli, hynrei na kine ki saw tylli ki bol u la lait noh kawei ka sien ban ioh ia ka nam hat-trick.

Da ka jingwan jong u Jotin Pheiroijam, ka rukom kamai jong ka Manipur ka la kiew da 131, kaba pyni ba u la lah ban kamai 2 run sha lade ha man la ka 3 run sha ka kynhun Manipur. Katba ka dang iaid ka jingialeh ka la don ka jingkhyllem jong ki wicket ha shuwa jong u, hynrei u la ialeh katlah ban iaineh, tad haduh ba ka bol ba u la tied ka la shah kem noh ha u Waldo Sangma da ka jingkawang jong u Raghav Magotra.

Ha kaba kut u Gurung u la lah ban ioh bun wicket da 3/55, katba u Magotra u ioh 2/25, u PM Santhosh u ioh 2/27 bad u Manish Sharma u ioh 2/55 kiba lah ioh mar 2 ngut ki wicket.

Ha ka kylla miet, kiba la sdang tied na ka liang ka Meghalaya, kata u Anmol Sunar bad u Mrinal Das ki la sdang ialehkai bha hynrei u Anmol u la shah weng kloi noh da 15 run bad kiba bud nadien jong u kim shym la lah shuh ban kamai bha ha kaba u Kadamjit uba na Manipur u la lah ban weng san ngut ki nongtied ka Meghalaya tang ha ki phra over
Hadien kane, ka Meghalaya kam shym la noh mynsiem, da ka jing wan jong u Das uba la lah ban kamai bha da 49 bad dang iaineh ha ka jnglehkai, bad mynta ka kynhun Meghalaya ka don ka jingkyrmen sa tang ha une u rang ialeh ban kyntiew ia ka jinglehkai. Ha kaba kut jong ka sngi, u Das u la ioh ban ianeh paralok bad u Gurung uba dang ioh dang san run ha ka sngi kaba nyngkong bad kane ka kynhun ka don jingkyrmen ha kine ki paralok arngut ba kin lah ban kot sha ka total jong ka Manipur ha ka sngi kaba bud.