Shah tuh Mobile, pisa ka nongtrei na khmat kamra u CEM KHADC

Shillong, 17 Jylliew:
Khyndiat kynta shuwa ban sdang ka por treikam ki nongtrei ka Khasi Hils Autonomous District Council ( KHA DC), ka la don ka jingjia shah tuh ha katei ka ophis bad katei ka jingjia ka la jia ha ka por 9 baje myn step bad ka jingshah tuh ka dei na khmat ka kamra u CEM ka KHADC ka kamra ba ju shong ki PA sha u CEM.
Ha katei ka jingjia la ong ba tang sa shi kynta eiei shuwa ba ki nongtrei ka Council kin poi sha jaka trei jong ki, ka nongpynkhuid (Cleaner) kaba ju pynkhuid ia ka kamra jong u CEM ka KHADC ka la rung shapoh kamra jong u ban leit pynkhuid, katba ia ka pla jong ka pat ka la buh ha ka kamra ba ju shong ki PA u CEM. Hynrei ha katei ka por la iathuh ba ym shym la don briew hajan katei ka kamra bad ka long kynjah jar jar, hynrei haba ka la mih napoh kamra u CEM ka shem pynban ba ka Mobile jong ka kaba ka la thep hapoh pla ka la shah tuh bad u nongtuh u la kloh ruh ia ka pisa T.1000 tyngka ( shi hajar) .
Hadien ba la jia katei ka jingjia, katei ka nongpynkhuid kaba la buhrieh kyrteng ka la leit ban iathuh ha ki bor ba peit ia ka District Council bad ki la plie ia ka CCTV ban peit mano ba rung namar ba la pyndait CCTV sawdong ia ka Council. Ha ka CCTV la iohi ia uwei u briew uba kit pla shadien ba u la rung hapoh ka Council ha ka por 9 baje mynstep bad la ong ba dei ma u uba la tuh na ka pla jong katei ka nongtrei.
Kham hadien la ai jingmut ia katei ka nongtrei ba kan leit ujor sha ki pulit dalade hi, haba kren bad u nongthohkhubor u bah James Sylliang EM ba peit ia ka tnad Enforcement u la ong ba u nongtuh u la tuh ia ki tiar jong ka bad um shym la ktah ia ka tiar jong ka Council.
Haba la wad jingtip shano ki pulit Enforcement ka KHADC kiba dei ban peit ban pahara ba kan ym mih kaba kum katei ka jingjia, ki tyllong khubor ba la ioh lum na ki pulit Enforcement la ong ba katei ka por 9 baje mynstep ka dei ka por ba ki pulit kim pat wan trei, bad katba ki pulit KHADC kim pat dei ka por trei jong ki ia ka Council hap ban phikir bad peit u Chowkidar. Halor kajuh katei ka jingjia u CEM ka KHADC u la kyntu ia ki pulit ba ki dei ban kem ia utei u briew uba la iohi dur hapoh CCTV Camera.