Phi la shet shukor bad ieh khunswet ia ngi, ki nongkyrshan, ong ki nongkyrshan u Bah George B. Lyngdoh ha Umroi

Nongpoh:Ki nongkitkam ba hakhmat eh jong ka Umroi Block Youths Congress Committee, ki la ong ba u Bah George B. Lyngdoh, uba dei u MLA jongki na Umroi Constituency, ia uba ki la trei shitom eh bad shah ia shibun ki jingeh ban pynjop don burom ia u ha ka ilekshon 2018, hynrei mynta u la shet kylla bad ieh khunswet ia ki nongkyrshan jong u, da kaba u leit ban pyniasoh ialade sha ka TMC khlem da pyntip wat ia ki nongkitkam ka Party Congres ha Umroi bad khamtam eh ia ki paidbah nongkyrshan jong u hapoh ka Constituency hi baroh kawei.

Kitei ki nongkitkam ka Umroi Youth Congress, kiba kynthup ia u Samla Lumlang Lamarai, nangta u Samla Pynskhemborlang Sun, kim shym la kynthoh pyrshah eiei ruh em halor katei ka jingphet Seng u Bah George B. Lyngdoh, uba la mih na ka Congress da kaba leit pyniasoh ialade ha ryngkat 11 ngut kiwei ki para MLA Congress sha ka TMC, hynrei ka kyntien kaba shai na ka jingkren jong ki, ka long ba ka Congress ha Umroi ka dang khlain kumba ka long ha ki sngi ki por ba la dep.

“Bah George B. Lyngdoh, wat la phi la ieh khunswet iangi khlem kano kano ka jingkynjoh ktien ne pyntip iangi, hynrei watla katta ngi ai ka jingkhublei ba phin nangkiew shakhmat shaphrang ha ki kam ki jam jongphi” la pynpaw kitei ki nongkitkam ka Umroi Youths Congress.

Haba pyrshang ban kylli la ka don jingktah ne em ia ka Congress ha Umroi Constituency, kitei ki nongialam ka Congress ha Umroi, ki la ong ba ka Congress ha Umroi hi ka dang khlain bad kam don jingktah ei ei ruh em, namar kat haduh mynta ki nongkyrshan ki dang neh ha ka Party.
Ki la ong ruh ba shen kin sa lum ia baroh ki nongkyrshan ka party ha Umroi, kiba kynthup naduh ki Parents Body, ki Mahila bad kumjuh ruh ia ki samla kiba kyrshan ia ka Party.