Ym dei u khaw plastik, dei u khaw ba la shna khnang, ong u heh FCI

Shillong:Ha kine ki khyndiat bnai ha ka jylla, la ju iohsngew ia ka jingioh kurup ia u khaw plastic na u khaw ration bad na ki khaw ba ioh naki skul lane u khaw mid day meal ha kaba kane ka jingioh kurup ia une u khaw ka la buh ia ki nongshong shnong kiba bam ha ka jingsheptieng kaba khraw.

Kum shibynta ban wad ia ka jing shisha halor u tei u khaw ba la kynnoh na u dei u khaw plastic, na ka liang ki lad pathai khubor ki hiar sha ka jaka stock khaw ha FCI godown kaba ha ha ka shnong Mawsmai 11mer Ri Bhoi District, ha kaba la leit ban ia kynduh ia u Divisional manager jong ka Shillong FCI, u Bajrang Agarwal.

Haba la ioh ban ia kren bad u Divisional Manager jong ka shillong FCI u la pynshai halor utei u khaw u lah iathuh ba ka long kaba bakla ban ong ba u khaw Artificial, ban ong u khaw plastic, namar ha ka jingshisha u dei hi u khaw kumba ngi jubam ka rukom shet ka long kumjuh, hynrei u kham bha bad kham myntoi ban bam da une u khaw, namar ia une u khaw la pynlwet shwa kum u powder bad hadien kata ki sa pynkhleh lang bad ki kynja ba long vitamin ha utei khaw.
“Une u khaw u dei u ba la khleh lang Iron, Folicacid,Zinc, Vitamin 12 khnang ban lah ban pynbiang ia ki jingtei met ki ba pura ym tang ba un shu pynkdang,bad ka jingthmu jong ka sorkar India ka long ban phah khnang ia une u khaw sha ki khynnah skul lyngba ka mid-day Meal”u la ong.

U la bynrap shuh shuh “Ka India ka dei ka Ri ka ba ju mad ia ka jingduna ki jingbam ba tei met khamtam ha ki khynnah, kumta lyngba une u khaw un lah ban wanrah ia ka jingmyntoi bha ia ki khynnah haba iadei ha ka liang bad ka koit ka khiah namar ha une khaw la kynthup lane la khleh bad ki kynja vitamins kiba lah ban ai ka jing ioh nong iaka koit ka khiah.