Sa ka jait thymmai jong ka khlam corona, ka mih pyrthei ha ki Ri Africa

Ka khlam corona, ka la mih sa ka jait ka kur kaba thymmai, ha kine ki sngi bad katei ka jait thymmai, ka sdang mih pyrthe na ki Ri jong ki dohiong.

Katei ka jinglap ia katei ka khlam, ka la buh ia ka jingma kaba khraw ia ki ri bapher jong ka pyrthei bad la iathuh ba ka United Kingdom bad kiwei ki Ri Europe, ki la khang sbak, ia ka leit ka wan jong ki briew, kiba wan na ki ri Africa, da ka jingsngew tieng kaba khraw, ba kan sa wan biang ka jing ia bit kaba jur jong ka khlam covid 19, ha ki sngi, ki ban sa wan.
Ka Ursula von der Leyen, President ka EU Commission, ka la ai jingmut, ban khang ia ka leit ka wan jong ki liengsuin na ki ri ba shathie jong ka Africa.

Utei u khniang corona, uba nyngkong duh, u dei uba la tip, da ka kyrteng B.1.1.529 bad la lap nyngkong eh ha Botswana. Katei ka jingpang, ka la nang pur mynta sha South Africa.
U Joe Phaahla, myntri ka tnat ka koit ka khiah ka South Africa, hynnin ka sngi, ula pyn thikna, ia ka jinglap ia katei ka jingpang kaba thymmai bad la iathuh ba katei ka jingpang, ka pur stet bha ha ki khynnah samla.

“Ha kine ki 4,5 sngi, ka la don ka jingkiew stet jong kane ka khlam, kaba la ishyrkhei shibun” ong U Phaahla, ha ka lad pathai khubor.
Ka South Africa, ka pynthikna haduh mynta, ba ki don 100 tylli ki dak jong katei ka jingpang B.1.1.529 bad ia katei la lap, ha ka jaka kaba bun briew bah ha ka jylla Gauteng. Ym tang katta, la lap ia katei ka jingpang nalor ka Botswana bad ka South Africa, hynrei mynta, ka la poi ha Hong Kong bad ha Israel.