Pan map U MRD, halor ka ain nongrep

U Narendra Modi, myntri rang bah duh ka Ri, ula hap ban pyndem toin ialade, ha khmat ki nongrep, kiba bun na ki, ki dei na ka thain shatei jong ka Ri, kum ka Punjab, Haryana, Uttar Pradesh.

Ha ka jingkren sha u paidlang ka Ri, U Modi, ha ka sien nyngkong, ula pan map, halor ka jingthaw ia ka ain nongrep, ha kaba u da pynbna ruh, ba un weng noh ia katei ka ain, ha ka dorbar bah jong ka Ri, ka ban sa long shen.
Ym tang katta, u da kren sngew diaw, ba um shym la lah ban pyn sngewthuh ia ka jing donkam jong katei ka ain sha ki nongrep.

Haba iakren ia kane ka mat, ka la dei ka por, ba ngin sngewthuh ba ka India, ka dei ka ri synshar paidbah bad kam dei ka ri, ban synshar ia kano kano ka niam, ia kano kano ka thain, lane ia kano kano ka jaitbynriew bad kane ka Ri, ka tyllun ha ki 75snem jongka, ha katei ka mynsiem.
Ngim lah len, ba kane ka Ri, ka la mad ia shibun bah ki maw jynthut, hynrei ka mynsiem jong ka synshar paidbah ba nylla jongka, ka la lah ban jynrat ia kitei ki dieng pyngkiang ba har rukom.

U paidlang ka India, ula ai ia ka jing kyrshan radbah ia ka seng BJP (NDA), ha ki ar tylli ki elekshon ba ladep (2014, 2019), da ka jingkhmih lynti ba katei ka kynhun, kan thaw thymmai ia ka India (ym ba kan thaw thymmai ia kano kano ka niam) bad lada kane ka kynhun, ka la iaid ha katei ka nongrim, ka India, kan jin da la kiew stet ka spah ka phew jongka, ha kine ki sngi.
Hynrei ki jing shisha, ki long da khongpong, ha kaba ia ka ain, kaba la shu thaw kyrkieh, la hap ban pynduh pyndam noh ia ka bad ka long ka jinglehrain ia ka sorkar bad wat ia ki dkhot jong ka Parliament, ba ki dei, ki bym nang satia ban thaw ain, bad katei ka pyni, ba u kham iohi jngai pynban u nongrep.

Ban pynkut, ngi hap ban rieh tngen, ha kawei ka kyntien, kaba ong “ban ia ka bym leh syndon, bha kaba leh, da ka slem makna ruh” bad lyngba kane ka ain nongrep, kaba u myntri rangbah duh, ula pdiang ia la ka jong ka jing bakla, ka la bha ruh, ba un pan map na u paidlang ka Ri, ia ka jing pynduh pisa, ha u snem 2016, kaba dei kawei na ki jingleh kaba bakla shibun bad ka la bha ba un pynbeit ia la ki jing bakla, ha shwa ka elekshon sha Punjab, UP, ka ban rai ruh ia ka 2024 jong ka India.