Hikai rep ka HYC

Shillong, 16 Jylliew:
Ka Hynniewtrep Youth Council Mawryng kneng Circle lyngba ka Farmer Cell ka la pyn long ia ka Awareness Programme cum Training halor ka rukom rep da kaba pyndonkam da ki sboh mariang ia ki nong rep jong ka thain Maw ryngkneng kaba la long ha ka 15 tarik u jylliew ha community hall Maw ryngkneng. Ha katei ka sngi la pyniaid ia ka prokram da u Chairman jong ka farmer cell u bah Robinson Nongrum u ba long ruh u Vice President jong ka HYC Mawryng kneng Circle .
Ha katei ka sngi la ai jing batai bad jing pynshai da ki riewshem phang na ka ophis jong ka Krishi Vigyan Kendra (KVK) Upper Shillong East Khasi Hills. Ha kaba nyngkong la ioh ia ka jing batai ba kham bniah shaphang ka rukom rep da kaba pyndonkam ia ki sboh mariang (organic farming) da u R.C.A Sangma, ha ka ba iadei pat bad ki lad jingiada na ka bynta ki khniang bad ki jingpang jong ki jingthung la ai jing batai bniah da I kong B.Chyne bad ha kaba khatduh la ioh ia ka jing batai da u bah S.Marbaniang, kumno ban pynsuk ia ki nongrep ban ioh ia ki jingtip ba kham bniah shaphang ka rukom rep ka juk ba mynta da ka ba pyndonkam lyngba
ki kor computer bad mobile da kaba ki ioh ia ki jing batai lyngba ki sms na ka Intelligent Advisory System for Farmer ( IASF).
Namar kumba long mynta bun na ki nongrep jong kane ka thain ki dang pyndonkam ia ki dawai sboh kum ka UREA, DAP,MOP bad kiwei kiwei kaba long ka jingma na ka bynta ka koit ka khiah bad kumjuh ruh ka pyntroin ia ka bor jong ka khyndew. Ha katei ka sngi la ioh jingkren ruh na u sordar jong ka shnong Mawryngkneng bah Peter J Lawai u ba long kum u kongsan ha katei ka sngi. Ia kane ka kyrwoh la pyllait da u publicity secretary HYC Mawryngkneng Circle bah Lakhon Dkhar.