Tem sur tynrai ki samla pule ka MLCU ha Nan Polok

Shillong, 14 Jylliew:  
Ki nongiaid kai bam lyer ha Nan Polok ha kane ka janmiet sngi Saitjain ki la ktik mynsiem ban ioh sngew sngur ia ka sur tynrai na ki samla pule ka skul bah Martin Luther Christian University (MLCU).
Ki nongiaid kai bam lyer ki bym mut dur ban ioh sngew ia ka sur tem ha ki por mynshwa, ki la sngew ktik ka jingmut jingpyrkhat haba ki iohi bad ioh sngew ia ka sur tem tynrai na ki samla kane ka skulbah. Ki samla pule kane ka skul bah ki la pynlong ia kane ka jingiatem iaput shi bynta ban pynkhreh ia ki samla pule ha ka sur tem ne Music jong kane ka skulbah bad ban pynpaw ba ka nongbah Shillong ka dei ka ktem jong ki sur bad ki jingtem.
Kiba sngew khuslai mynsiem kiba bun jingmut jingpyrkhat kin ioh lad ban pynthanda haba ki ioh sngew ia ka sur jong ki nongtem ha kum kane ka por. Ia kane ka jingiatem iaput la ialam da u khlieh ka Fine Arts kane ka skul bah u Bah Wada Kharkhuli.
Bun ki nongwankai ha kane jaka bam lyer pynngad ki sngew tynnad ban ioh sngew ia ki sur ha kane ka janmiet.