Naduh u 1995, shah tait ka longing ha Khlieh Umtrew Tdoh rBym siew ia ka 2 tyngka, ong ka CSWO

Shillong, 14 Jylliew: 
Ka CSWO ka la kynnoh ba kawei ka longing naduh u snem 1995 ka la shah tait shnong bad shah pynduh ia ki jing myntoi tang namar ba kam shym la siew ia ka bai synniang kaba T. 2 tyngka halor ka jingujor ka Seng Longkmie sha ka bor shnong Khlieh Umtrew Tdoh kaba hap ha Ri-Bhoi district.
Ha ka jingpynlait khubor ha kane ka sngi u Blei, ka president ka CSWO ka Kong Agnes Kharshiing ka la kynnoh ba ka longing jong ka kong Markaret Jarain ka la shah tait shnong ha ka Dorbar shnong Khlieh Umtrew Tdoh ka Raid Mawbuh hapoh Myllem Syiemship naduh u snem 1995.
Naduh kane ka snem, kane ka longing ka la shah pynduh ban ioh jingmyntoi na ki skhim sorkar, bad kiwei kiba dei ban ioh.
“Ka HNYF Mawrong ka la thoh sha u Rangbah Shnong katei ka shnong dang shen ba don ki briew na kane ka shnong kiba pynwit ia katei ka longing da kaba kawang maw ia ka iing jongka”, la ong ka Kong Kharshiing.
Ka HNYF ka la pynpaw ia ka jingsngew khia ia ka jingshah pynduh skhim kane ka longing bad ka la shah khot hajir ha ka shnong ha ka 13 tarik Jylliew, 2015 bad ha jaka ban weng noh ia ka rai ban tait shnong hynrei ka executive dorbar ka la kyntait ban weng ia ka rai tait shnong ia katei ka longing.
Halor kane, ka CSWO ka la kyntu ia ki bor ka ain ba kin leh ia kaba donkam halor kane ka jingleh jong ka dorbar shnong ia katei ka longing ha katei ka shnong.