Sha ka DC, ujor ka GSU; pyrshah ia u bar jylla ba kynshlein kynthei

Nongpoh: Ki nongialam ka Garo Student Union, Byrnihat, ki la ujor da ka jingthoh sha ka Deputy Commissioner Ri Bhoi, ban ujor pyrshah ia u manager jong kawei ka Kompani kaba la tip kum u Manoj Sharma, halor ka jingkynnoh ba utei u Manoj Sharma, u la ktah kti bad leh kynshlein ia kawei ka samla kaba dei ka nongtrei hapoh katei ka Kompani.

Utei u Manoj Sharma, u dei u Manager jong kawei ka Kompani kaba la tip kum ka Orient Health Food Pvt. Ltd bad kaba hapoh ka shnong Rajabagan Byrnihat. La kynnoh ba utei u Manager u la don kti ha kaba leh kynshlein ia ki kynthei ki khynnah kiba trei hapoh katei ka Kompani bad nalorkata la kynnoh ruh ba u la pyntrei da ki khynnah rit bad kiba ym pat ia hap ka rta ban trei kumba la khang pyrshah da ka sorkar.

Lyngba katei ka shithi jingujor, ka GSU kyrpad jur na ka deputy Commissioner ka Ri Bhoi ba kan leh ei ei ia katei ka Kompani bad kumjuh ruh ban pynshitom ia utei u Manager ba ju leh kynshlein ia ki kynthei ki khynnah bad ka da kaba ka GSU ka ujor bad pyrshah ruh ka long ban khanglad kum kine ki kam kiba leh kynshlein ne thombor ia ki khyllung ki khynnah.