Pynkha tnad ka KSU sha bar jylla

Jowai, 14 Jylliew:
Ka Khasi Students’ Union (KSU), Central Body ka la pyniar sa kawei ka tnad treikam jong ka sha bar jong ka jylla Meghalaya na ka bynta ban lum ban lang ia ki paid Khasi khara kiba shong shnong shabar ka jylla. Katei ka tnad thym mai la pynkha ha Umrang soo kaba la tip ruh kum ka KSU- Umrangsoo unit kaba hap hapoh Dima Hasao District jong ka jylla Assam.
Ha ki por ba la dep, ka KSU ka la dep ban pynkha ia ka tnad treikam jong ka ha Mizoram, Dehradun bad Delhi. Ha kaba iadei bad ka tnad ha Umrangsoo, la pynskhem bad pynsmai ia ki nong ialam ka seng da u samla Bansharai Warjri uba dei u Organizing Secretary ka seng ha ka jingiadonlang u Education Secretary, u Donald V Thabah nalor kiwei kiwei de ki dkhot bad nong ialam ka seng.
Ka KSU ka la ong ba ka Dima Hasao District ka dang hap hapoh ka jingsynshar u Syiem Sutnga ha ka por ki Syiem Jaintia.
Ha kane ka sngi la jied ia ka samla Monalisa Dhar kum ka President bad haba kren ka la ong ba bunsien ki Khasi jong ngi ki ju sngewsarong ban kren ia ki ktien nongwei katba ki klet ban burom pat ia ka ktien la jong. Ka la pynpaw ruh iaka jingpyrshah jur halor ka jingshongkha khleh. Ia ka jingialang la pyniaid da u samla N Sutnga- financial Secretary ka seng.