Kurup kynja ki pulit, na u koidi

Shillong, 14 Jylliew:
Ka jingjia ha Shil long District Jail ka la ju mih bun kiei kiei naduh ka jinglait tuh ki mobile, ka jinglait phet ki koidi bad kiwei hynrei ha kane ka sien ba mynta ka la mih sa kawei ka jingjia bad kata ka dei ka jingioh kurup ia u kynja na u koidi (Under Trial Prisoner) ba shah set ha kane ka phatok bad ka pisa hadien ba ki bor pyniaid ki la pynlong ia ka jingkhynra ha kane ka phatok hadien ba la ioh jingtip.
“La ioh kurup ia u kynja bad pisa na uwei u koidi hadien ba la pynlong ia ka jingkhynra shwa ban phah rung ia ki koidi shapoh ka phatok” la ong u DG (Prison) Bah BL Buam.
Na une u koidi la ioh kurup 3 gram u kynja bad ka pisa ba T.360, la ong u Bah Buam bad bynrap ba une u koidi u dei ba la wanrah na Nongpoh sha Shillong. U Bah Buam u la ong ba ka jingkhynra bad peit ngor ia ki koidi ka dei ka kyndon ba la buh ban leh shwa ban pdiang ia uno uno u koidi ban thep ha phatok ban pynthikna ba kin nym don kino kino ki tiar ba long beain hapoh ka phatok.