Ha ka VAB, la niew ia ki Garo, tang kum ki mraw

Shillong, 12 Jylliew:  
U Secretary ka Malor Association ka Dwara Nongtyrnem Sir darship hapoh Mawsyn ram, u Carlos D Sangma, u la kyntu ia u Lat ka jylla u V Shanmuganathan ban pynrung ia ki kyndon ba iahap katkum ki riti dustur jong ki Garo kiba sah hapoh u pud u sam ka KHADC ha ka Village Administration Bill barim ka KHADC.
 ”Ha ka kyrteng jong ki nongshong shnong Garo kiba sah hapoh u pud u sam jong ka KHADC, nga kwah ban kyrpad ia phi (Lat) ban pynrung ia ki kyndon ba iahap katkum ki riti dustur jong ki Garo bad kiwei ki jaitbynriew ha ka VAB,” la ong u Sangma ha ka jingthoh ba la aiti ha u Lat ka jylla ha kane ka sngi Thohdieng.
U la ong ba ki don shibun bah ki shnong ba shong ki jaitbynriew Garo kiba hap hapoh u pud u sam ka KHADC bad kiwei ki jaitbynriew kum ki Hajong, Banais bad ki Koch bad bynrap ba ha kine ki shnong ym don Khasi satia ki nongshong shnong.
“Ki don palat shi hajar ngut ki Garo ba sah hapoh u pud u sam ka KHADC kumba la bsuh ha ka Annexure I bad II  jong ka VAB, 2012.  Kine ki shnong la khlieh ne pyniaid da ki motor/morol bad ha ki katto katne ki jaka la khot kum ki Rangbah Shnong Garo”, la ong u secretary ka Malor Association ka Dwara Nongtyrnem Sirdarship. Katkum ka jingong u Sangma, naduh ki por hyndai hynthai, ki riti dustur jong ki ba la leh ha Dwara Nongtyrnem Sirdarship ba la ia ka shnong la jied ia u molor bad la pdiang da u Sirdar bad ruh ka Executive Committee ka KHADC. U la ong ba ka VAB ka KHADC 2012 kam shym la kdew ne bsuh ia kano kano ka kyndon ia ki jaitbynriew Garo kiba don palat hajar ha ki shnong, wat la ki dei ki scheduled tribe jong kane ka jylla kumba long kiwei ki jaitbynriew.  ”Ki Garo ki shim bynta ha ka elekshon MDC ka KHADC, hynrei sngewsih ba ka Council kam shym la peit ban pynneh ia ka riti dustur jongki”, la ong u Sangma.
 ”Ka VAB ka KHADC ka la bsuh ia ki Garo tang kum ki raiot ne ki mraw”, la ong U secretary ka Malor Association ka Dwara Nongtyrnem Sirdarship.