Hiar Jerobad u Conrad, ban plie skim sam um ha katei ka thain

Nongpoh:Ka la long shisha kaba la pynkmen eh ia ki paidbah na ka shnong Ampangre, Jerobad bad Mawsmai, ki shnong kiba don ha khappud ka Meghalaya bad Assam, kata ka la jia hynnin ka sngi bad kata ka la long ba u Conrad K. Sangma, Myntri Rangbah ka sorkar jylla, u la leit ban plie paidbah na ka bynta ban pyntrei ia ka skim sam umbam umdih sha ki paidbah sha kitei ki shnong.

Ha kaba plie ia katei ka skim sam umbam sha ki paidbah, nalor u Conrad K. Sangma, la sakhi da ka jingdon u Bah Soshenes Sohtun, MLA Jirang, u Bah Victor Rani, MDC, u Commissioner Secretary ka tnat PHE & Forest u Bah S.M.A Rajy, u Chief Engineer ka PHE u Bah CR Challam, ka Kong R.M Kurbah, DC lem bad kiwei.

Katei ka skim kaba la plie paidbah hynne ka sngi, ka dei kaba la tip kum ka Jorabat Combine Water Supple Scheme, kaba la mang na ka Jal Jeevan Mission kan long ka jingkyrkhu kaba khraw ïa ki nongshong shnong jong kine ki shnong ha khappud ha kaba la mang tyngka haduh 13.13 cr.

Haba iadei bad katei ka jinglah ban wanrah ia katei ka skim sam umbam sha kitei ki shnong, ki riew paidbah na kitei ki shnong, ki la pynpaw ia ka jingkmen kaba khraw eh bad kiba la ai jingiaroh ia u Myntri Rangbah bad ia u MLA Jirang, namar ba nangne shakhmat ba kin sa ioh umbam sha la ki jong ki iing ki sem, namar ba kitei ki shnong ki la mad ia ka jingeh kaba khraw eh haba iadei bad ka umbam umdih.