Dang jah rngai 2 ngut, ha ka jingtwa khyndew

Shillong, 12 Jylliew:
Ki ar ngut kiba dang jah rngai ha ka jingtwa khyndew u bah Maskel Riahtam na ka shnong Maw kliaw bad u bah Rishai Khongdup na ka shnong Mawlatang ki dang jah rngai haduh mynta bad ym pat shym la lap ia ki.Ka jingwad ia kitei ki ar-ngut da ki paidbah na ki ar shnong ryngkat ki bor pulit ka la iaid sha ka ar sngi, hynrei ym pat lap satia. La ia thuh ba ka jingeh ka dei naba ka la heh palat ka um ha Wahbah (Wah Um rew) bad ka jingtwa khyndew bad ka jingkhyllem ki dieng ki siej ha kiba bun kitei ki jaka. Lah ban kdew ba katei ka jingjia twa khyndew ka la jia ha ka shiteng miet jong ka miet 9 tarik, ha kaba 3 ngut ki la shah rong ha ka twa kaba la kit ia ka ing ba ki sah shaduh Wahbah, bad haduh mynta la lap dang ia ka metiap u khynnah ba dang 8 snem karta u Skhembor Syngai, kaba la lap da ki nongkhwai dohkha.
Halor katei ka jingjia , u MLA ka Sohra uba dei ruh u MDC barim katei ka thain u bah Titos W Chyne u la phah ia ka jingsngewlem sha ki bahaing hasem halor katei ka jingjia ba sngewsih bad u la dawa na ka sorkar ba ka dei ban siew bai lutksan sha ki bahaing hasem halor katei ka jingjia. U la iathuh ba u la phone sha u SDO ( Civil) ka Sohra ha kaba u SDO u la ong ba u la phah ia ka ripod sha u Deputy Commissioner ka East Khasi Hills ban leh ia kaba donkam.