Ka sorkar kam lah ban shim pisa na ka Tourism, ai sha ka Education, ong U MR

Shillong:U myntri rangbah ka jylla u Conrad K Sangma u la ong ba ha kine ki khyndiat sngi ka jylla, kan sa ioh ban sakhi ia ki tamasa bapher bapher, ha kaba ia kane, na ka liang ka sorkar ka la ai lad kum shi bynta ban kyntiew ia ka kam jngoh kai pyrthei ha ka jylla.

Haba kren bad ki lad pathai khubor na ka liang u Myntri rangbah u la ong “Na ka daw jong ka khlam kaba la wan ban lynshop ha ka jylla ka tnad jngohkai pyrthei ha ka jylla ka la shah ktah jur palat kumta ngi donkam ban kham pynkiew ha kane ka liang, bad nga sngew ba kum kine ki jait program la dei ban pynlong ban wanrah ia ka ioh ka kot ha ka jylla”.
U Sangma u la ong ba bun na ki briew kiba kynnoh ba bun sa tang ki jingpynlut, katba ia ka tulop ki nonghikai kim lah ban siew, hynrei ka sorkar kan ym lah ban shim ia ka mang tyngka na ka tnad Tourism bad ban ai ia ka tnad pule puthi, namar ba hadien ha bud kine baroh artylli ki tnad kin ngat ha ka jingeh.

U la ong “Ka dei ka kam ram jong ka sorkar jylla ban pynbiang ia ki jingdon kam jong kiba bun, hynrei kam long pat shu ong ba kiwei ki sector ki duna ngin shim noh na ka mang tyngka na ka wei ka sector bad ban ai ia ki, kaba donkam ka long ban ia pyn ia biang lang ha baroh arliang”.
Wat la ki ba bun ki sector ki duna, hynrei ka dei ruh kaba donkam ban pyrkhat ba da ki hajar hajar ngut ki briew kiba im jakpoh lyngba ka kam jngohkai pyrthei bad ban pynbiang ia kine baroh, na ka liang ka sorkar kan hap ban pyrkhat ia ka ne ka bynta ruh la ong u myntri rangbah.
“Ka Cherry Blossom Festival, ka Winter Festival, bad ka Megha Festival ka ban long ha ka Garo Hills mynta u bnai bad ka jingthmu ban pynlong ia kine ki festival ki long ban pynsaphriang ia ka jingdon ki nongjngohkai pyrthei ha baroh kawei ka jylla bad ngin sa peit ha ki sngi ban wan kat kum ka jingdonkam ngin sa shim ia ka rai ban pynlong shuh shuh ia kum kine ki program”la ong u Myntri rangbah.

Haba kylli u la ong “Halor ka jingpynjynsur ia ka Protocol, ka long namar ba bun na ki briew ki la dep ban aa ia ka tikka, khamtam ki briew ki ba wan na bar ka jylla kin dei beit kiba la dep ban ai Tikka ar sien, kumta na ka liang jong nga, nga kyntu ia ki paidbah ba kin leit ban ai vaccine ialade namar ba kan dei tang kane kaba lah ban iada na kane ka khlam”.