Shillong:Da ka jing sngewsarong bad ka jingkmen bakhraw, ka Hill’s Farmer Union, West Jaintia Hills District ka la pdiang sngewbha ia ka kong Trinity Sayoo, ka Nongrep ba la ioh pdiang ia ka Khusnam baheh tam ha ka ri (Padma Shree Awared) na u President ka Ri India u Ram Nath Kovind ha Nongbah Delhi.
Kum ban pynkynmaw, ka kong Trinity Sayoo, ka la iohpdiang ia kane ka khusnam naka daw ka jinglah jong ka, ban pynshlur ia ki nongrep bad ban pynpawnam ia u Shynrai Lakadong.
Ha ka sngi 10tarik Naiwieng 2021, ka kong Trinity Sayoo, ka la wan phai sha la iing bad ki nongialam ba hakhmat jong ka HFU West Jaintia Hills District ha ryngkat ki nongrep, ki la leit ban pdiang sngewbha ia ka, naduh ka jaka shwa ban rung sha West Jaintia Hills District, ha lait shnong Mookyndur West jaintia Hills. Wat la ka por ka lah miet, ki nongrep ki ba dap da ka jingieid bad jingkmen kim shym kynrandien ban ap bad pdiang sngewbha ia ka nongrep kaba lah kyntiew shisha ia ka burom bad ka nam jong ki nongrep ka jylla bad ka District lyngba kane ka khusnam (award).
Ha kane ka jingpdiang burom lyngkot, la ioh ruh ia ka jingkren ai khublei na ka kong Trinity Sayoo kaba la ai mynsien ruh ia ki nongrep ban iai trei shitom bad ban long ki ba iatylli.
Ki nongialam ba ia don lang ha kane ka jingpdiang burom ki kynthup ia u bah Mutshwa Thabah, President, Mr Mosses Suting,Vice President), Mr Chanbor Rymbai, Secretary, Mr Supplyme Sari, Organizing Secretary, ki Executive members, ki president bad secretary na ki unit bapher bapher ka Thadlaskein Block bad ki nongrep.
La synran ia ka kong Trinity Sayoo, ban leit shim ia ka khunsnam na nongbah Delhi da U bah Allfondbirth Kharsyntiew, General Secretary, HFU Sengkmie bad U bah Demanson Lyngdoh Project officer jong ka Lakadong Mission ha ryngkat kiba ha iing hasem.
Phi don ban ong eiei?