Bym burom shuti ‘Shad Nongkrem’ khang khyrdep ka HANM ia ki Bank ha Byrnihat

Nongpoh: Hadien ba la iohi ba ki la don shibun ki Bank ha Byrnihat, kiba la pyni ba kim burom ia ka shuti ‘Shad Nongkrem’, ki nongialam lem bad ki dkhot ka Hynnewtrep Achik National Movement (HANM) Byrnihat Circle, hynne ka sngi ki la leit ban khang khyrdep ia ki katto katne ki Bank kiba don ha Byrnihat.

Kitei ki nongialam ka HANM, kiba kynthup ia u samla Ajit Makri, President bad u Samla Mintu Lapang, Vice President lem bad ki dkhot, haba ki la iohi ba ki Bank ha Byrnihat ki plie beit, kiba kynthup ia ka State Bank of India, HDFC Bank, Meghalaya Cooperative Apex bank, Canara Bank, Northeast Bank, Syndicate Bank bad ka ICICI Bank, kumta kitei ki nongialam ka HANM, ki la shu leit khang beit ia ki halor ka nongrim ba kim burom ia ka shuti ‘Shad Nongkrem’ .

Halor katei ka jingbym burom da kitei ki Bank ia ka shuti ‘Shad Nongkrem’ u samla Ajit Makri, u la pynpaw ka jingsngewkhia ban iohi ba kitei ki Bank ba kim burom ia ka shuti ‘Shad Nongkrem’, kumta dei halor katei ka nongrim hadien ba iohi ba kitei ki bank ki treikam bad kim burom shuh ia ka shuti ‘Shad Nongkrem’, kaba la pynlong ia ki HANM ba kin leit khang khyrdep noh ia ki.