Kwah u heh HYC, ban tuklar ka kashari, ba duh tulop ki nonghikai

Shillong:U Bah Robert June Kharjahrin, President ka Hynniewtrep Youth Council (HYC) Sengkmie, ha ka sngi ba ar u la buh ka jingkyrpad ia ka Meghalaya High Court ba kan shim da ka Sou moto case halor ka jingeh jong ki nonghikai ha ka jylla.

Ia kane u la kren ha ka sngi ba ar, ha kaba na ka liang ka HYC ka la wan ban kyrshan lang ia ka jingiakhih jong ki nonghikai SSA ki ba la pynlong ia ka Mass Rally bad ia ka Mass Gathering ha madan Student, Shillong ban dawa ia ka sorkar jylla ba kan pyllait noh ia ka tulop jong ki, ka ba sah la 5 bnai,halor ka jingpynkiew ia ka tulop bad ban pynkynriah noh ia ki nonghikai SSA na ka state Implementation Society sha ka tnad jong ka State Education.

Ha kane ka sngi, na ka liang u bah Robertjune, u la thalain tyngeh halor ka jingpynmih kyrwoh na u Myntri ka tnad pule puthi u bah Lahkmen Rymbui ha kaba u la pynpaw ba ha ka jylla kam don ia ka lad ka lynti ban regularise ia ki nonghikai SSA da ka ba ong “Kane ka jingkren u myntri ka tnad pule puthi ka dei ka dak pynmynsaw ia ka jylla, namar kane ka lah ban long ba ka sorkar jylla kan lah ban khang khyrdep ia baroh ki skul SSA,lada ka sorkar pdeng kan sangeh noh ia kane ka program hato ka sorkar jylla kan khang khyrdep noh ia kine ki skul bad hato kan behkam noh ia baroh ki nonghikai”.

U la ong ruh “Ngi tip ia ka history jong phi ko minister ba phi dei ki riewkai, hynrei to iarap ia ka pule puthi ha ka jylla”. U la bynrap ruh “Lada ym don ki kynhun niam bapher, bapher ki balang bapher bapher ki briew ba nang ba stad ha ka jylla tang 30% ruh kin ym poi naka ta ka daw ynnai pynrem ia ki briew ki ba la bet ia ka jingnang jingstad ha ka jylla”.
“Ka sorkar ka leh kam kai ia ka lawei jong ka pule puthi ha ka jylla ha ka ba ki paralok jong nga na bar ka jylla kiba la ong ba kumno ka jylla Meghalaya ka kyntiew burom ia ka jingbiej ha ba kylli ki la jubab ba kumno u Myntri sorkar u ia thuh sarong ba u la pheil klass 12, lai sien na kata ka daw ka long ka ba sngewsih ban ong ba ia ka jingsah klas la kyntiew sha ka burom la pynlong kum ka jingsngewsarong ba lada pheil lai sien saw sien kan ym leilei hynrei minister yn long beit “u la ong.

U la bynrap shuh shuh “Ka dei na ka ne ka daw ba mynta ngi ioh ia ka kyrteng District kaba lada wad ha u geographical direction ruh ym don, nang ne shakhmat ki briew kin sa kren bein ia ngi ba ngi la wanrah ia u compas thymmai u bym pat don ha kanno kano ka pyrthei ruh kane ka dei namar ba ngi la pynkiew skong ia ka jingbiej”. U la ong ruh ba ka dei ka kamram jong ka sorkar jylla ba kan kren ia ka sorkar pdeng ba kan pyllait noh ia ka pisa, hynrei kaba lyngngoh ruh ba na ka liang ka sorkar pdeng kan ai daw ba kam don pisa ia ka pisa kaba la dep ban mang lupa ha ka budget ka SSA program ka dei kaba la bun snem bad lada kam don ka pisa balei kam don tang ia ka jylla Meghalaya.
Ka HYC ka kyntu ia ka Sorkar ba kan shim khia ban pyllait noh ia ka tulop jong ki nonghikai bad kumjuh ban pynkiew noh ia ka tulop jong ki namar ba ka Riti shynshar jong ka Ri India ka ong ka dor ba ia ryngkat ia ka kam ka ba ia ryngkat. U Bah Kharjahrin, u la kyntu ruh ia ka ingkashari ba donburom ha ka jylla ba wat kam dei ban ap haduh ba ki nonghikai kin mih ban ujor da ka case halor kane ka bynta, hynrei ka dei ban shim noh da ka Sou Motu ia kane ka Case.