Ym treikam ka Jylla, kumba bthah ka sorkar pdeng rSah umdum palat 100 ngut ki MPW ha jylla

Shillong, 11 Jylliew:  
Ka All Meghalaya Malaria Programme Wor kers Association (AMMP WA)ka la buh jingkylli ia ka sorkar jylla, halor ka jingbym lah ban bud ia ki kyndon ban pynrung kam ia ki Malaria Programme Workers (MPWs) kiba trei ha ka malaria control programme hapoh ka skhim National Vector Borne Disease Control Programme (NVDCP).
Ka jingbym lah ka sorkar jylla ban pynrung kam pura, ka la buh jingeh ia 100 ngut ki samla kiba trei ha  MPWs ha Khasi-Jaintia bad Garo Hills. 
“Ka sorkar pdeng ka la buh ia ka kyndon ia ka sorkar jylla naduh u Naiweing 2013  ba ka dei ban shim ki lad ki lynti ba biang ban pynrung kam pura hynrei haduh mynta ka sorkar jylla kam shym la leh leh eiei bad ka la shu pynsah teng ia kane ka kam”, la ong u President ka AMMPWA  u bah J Lyngdoh haba kren hynne ka sngi Palei sha ki nongthoh khubor.
U bah Lyngdoh u la ong ba ka sorkar pdeng ka la pynjlan por biang ia ka sorkar jylla haduh  hynriew bnai naduh ka 1 tarik Iaiong 2014 ba kadei ban thung kam pura ia ki 100 ngut ki samla MPWs.
“Wat hadien ba la pynjlan por ruh, ka sorkar jylla kam pat shym lah ban thung kam pura ia kine ki 100 ngut kumba la bthah da ka sorkar pdeng. Kane ka kam la shu sah teng wat la palat khyndai bnai wat hadien ba ka sorkar pdeng naduh ba ka la weng noh ia ka NVDCP  ha kane la jylla.”la ong u bah Lyngdoh.
U President ka AMMPWA u la ong ba ka jingleh mynthi ka sorkar ban pynbeit ia kane ka jingeh kaban ktah ia ka jingpyntreikam ia ka Malaria Control Programme khamtam haba sdang ka aiom shit mynta.
 ”Ha ki khyndiat snem ba la dep, ka MPW ka la iarap tnad ka koit ka khiah ban khang lad ia ka jingpang malaria ne khieshohrih ha ka jylla nalor kiwei pat ki jingpang”, la ong u bah Lyngdoh.
U President ka AMMPWA u la ong ba ki la iakynduh ia u myntri ka koit ka khiah u Bah AL Hek bad kiwei ki heh sorkar ban wad jingtip ia kane.
 ”Man ka por ba iakynduh, ka jubab ka long ba dang eksamin ia kane ka kam.  Katba u myntri ka tnad ka koit ka khiah u thet kti da kaba ong ba um lah leh eiei namar ba ka rai ba kut ka shong ha u Myntri Rangbah” u la ong.
Katkum ka jingong u bah Lyngdoh, ka sorkar Assam ka la leh wut wut ban thung kam ia palat 200 ngut tam ki MPWs kiba trei ha kane ka Malaria Control Programme  ha ka jylla.