Mynsaw jur u nongniah bad 3 ngut ki nongshong, hajan Umling

Nongpoh: Ha kawei ka jingjia aksiden kaba la jia mynta ka sngi ha ka por 1 baje ei ei nohphaisngi, ki la don kumba 3 ngut ki nongshong ha kawei ka kali Tata Winger lem bad u nongniah, ki la mynsaw jur hadien ba katei ka kali ka la kum leit tynrah beit nadien jong kawei ka trok kit mar, kaba la pynieng harud u surok bah NH-6 ha ki bynta ka khlaw mar ia lait na shnong Umling haba kiew sha Shillong.

Katei ka kali Tata Winger kaba don ia u number ML04C 2807, ha kaba la ong ba ka dei kaba mih na Guwahati da ka jingthmu ban leit sha Lumshong, hynrei haba la poi ha katei ka jaka, ka la kum leit tynrah beit nadien jong katei ka trok kaba don ia u number NL01 AE 7634 bad kaba la wanrah ia ka jingmynsaw ki briew kiba shong hapoh katei ka kali.

Ha katei ka jingjia aksiden, 3 ngut ki briew ki la mynsaw jur bad uba la kham palat eh na ka jingmynsaw dei u nongniah jong katei ka kali Tata Winger.