Sdang ka Lawbyrwa Super League, ka lympung ialehkai phutbol ba iakhlieh dor ia ki rangialehkai ba tbit

Nongpoh: Ka Lawbyrwa Sports & Cultural Club, ka la pynlong ia kawei ka lympung ialehkai kaba kham pher na kiwei pat ki jait lympung kaba la pyniaid ha kiwei de ki shnong kaba ki la ai kyrteng kum ka Lawbyrwa Super League, ka lympung ialehkai kaba la lehkai tang da ki samla napoh katei hi ka shnong bad ka lympung kaba ki rangialehkai kiba kham tbit ki ioh ia ka ia ka dor kaba biang, kata katkum ka jingpyniaid hapoh katei ka Sports Club.

U Bah David Kurbah, President ka LS&CC, u la ba ka nongrim kaba la pynlong ia LS&CC ban kan pynlong ia katei ka Lawbyrwa Super League, ka long ban kyntiew shuh ia ka sap ka phong jong ki samla hapoh katei ka shnong, namar ha katei ka lympung, ki riew shimet na katei hi ka shnong kiba kwah ban iashimbynta ha katei ka lympung, ki lah ban jied ia ki rangialehkai ha ryngkat ka dor kaba kham rem, katba kito kiba dang duna ki ioh ia ka dor kaba kham tad. Kiba la donlang ha katei ka sngi kaba la plie paidbah, ki kynthup ia u Bah Liander Nongshli, Asst General Secretary ka RBYF Sengkmie, kum u kongsan, ha ryngkat ka jingdon u Bah P. Mawnai, Rangbah shnong ka Lawbyrwa, u Bah Devan Warjri, President Umsning Circle, u Bah Lan Syngkli, President 20mer Circle lem bad shibun ki riew rangbah na katei ka shnong.

U Bah Liander Syngkli, uba la ai jingkren ha katei ka sngi, ula pynpaw ia ka jingkmen ban iohi ba ki nongialam ka LS&CC ki shimkhia ban pynlong ia katei ka lympung bad kaba kham pher na kiwei pat ki lympung ialehkai kaba la pyniaid ha ki shnong bapher bapher bad uba la ong ba kaba kum katei ka lympung kan iarap shibun eh ban kyntiew ia ka sap ka phong ki khun samla hapoh katei ka shnong.

Utei u nongialam ka RBYF, u la ai ka jingkhublei kitbok kitrwiang ia ki nongialam ka LS&CC ba kin nanglah ban pynneh ia katei ka lympung ialehkai, da kaba u la ong ba katei ka kaba la pyni da ki nongialam ka LS&CC, kan dei kawei na ki nuksa babha sha kiwei ki nongialam ha ki Sports Club ha ki shnong bapher bapher, namar lyngba kiba kum kitei lympung, kan sa long kum kawei na ki lad ban kyntiew ia ki kam ialehkai bad ba ki shnong ne ka thain, kin sa lah ban sei ne pynmih ia kita ki rangialehkai ba kynsai.