Ka Congress thymmai, ka la kylla rim

Ka seng Congress, ka dang shu pyn thymmai shen, ia ki nong kitkam jongka bad ka la don ka jingpynher ia ka lyer sma iewbih sha kylleng ka jylla, tang mar ia shimti kam U President thymmai, uba dei ruh U MP ka Lok Sabbha.

Ym tang katta, hynrei, ka la don ka jing pdiang burom ia ki riew rangbah, ia ki MLA, MDC barim, da kaba khmih lynti, ba kan khring ia u paidlang ka jylla, ban iasoh sha katei ka seng.

Sngewsih, ba ka wan noh ka elekshon shiteng samoi bad mar kumta, ka lyer ka kylla khongpong, na ka jingiew bih sha ka jing iew khong bad ka daw, ka long ba U MDC jong katei ka seng, ula phet noh ban ialeh pyrshah ia ka parti lajong, nangta sa kiwei de ki dkhot bad ka seng Congress, ka la kylla long ka iing, kaba jot ba pei.
Ha ka jing kanbas ilekshon, la iohi, ba ki nongialam jong ka seng Congress, ki la bom, kumba bom doh shain ia kane ka sorkar MDA; hynrei, la iohi, kumba katei ruh kam larkam satia, namar ba ki nongjied ha ka elekshon shiteng samoi, ki la kyntait ia katei ka seng, na ki ar tylli ki ktem jongka hi bad ki la jied noh ia ka NPP.

U Ma Vincent Pala, uba dei u nong ialam rangbah jong ka Congress, ula klet ia ka jing kitkhlieh jongu, kum U MP sha Delhi, hynrei, ula pynlut por ialade, ban ia kynthih lang ha i pung iba rit jong ki MLA/MDC ha ki lai tylli ki Constituency; wat la katta, la iohi pynban, kumba kam siew dor eiei ruh em, ka jing kynnoh ia ka jing khrong pisa jubor, ka jing buh ia ki ATM ha surok bah bad ter ter.
Ha ka sain pyrthei jong ka jylla, la ju tip ia U Mukul Sangma, kum u nongialam ba rangbah jong ka seng Congress, ha kaba ha ka elekshon MLA 2018, ula pynlut por bad iaid kylleng, na ka bynta ban kanbas dalade hi bad ula hap ban her kylleng, da ka helicopter; hynrei ha kane ka kynti, U Sangma, um shym la wan iuh kjat sha Mawphlang lane sha Maw ryngkneng bad katei ka lah ban long ka daw, ba ka sa brut ka seng Congress ha kitei ki jaka.

U Ma Vincent Pala, kum u khlieh duh jong ka seng Congress, ula hap ban tih bniah ia ka daw rem jong ki lai ngut ki kandidet jongu, namar ba lada u kynnoh ba ki rem, na ka bor jong ka pisa, kumta ialade pat, kumno un pynksan; haba u jop ha ka jing iakhun pyrshah ia u kandidet UDP bad lada ka long kumta, ka pyni, ba u kham bun pisa ma u, ia u kandidet, uba don ha ka sorkar.