“Wat haba la pynduna khajna, dang heh dor ka umphniang ha jylla”

Shillong:Kumba la pynbna da ka sorkar Pdeng ban pynduna ïa ka khajna Excise Duty halor ka Petrol bad Diesel da 5 bad T. 10 naduh ka 4 tarik mynta u bnai, 2021, na ka liang ka HYC SengKmie ka la ong ba ka dei ka sienjam kaba donkam bha bad kan ïarap ïa kiba kyrduh bad ki longïing ba long pdeng jong ka imlang sahlang da kaba pynhiar dor bad pynneh ïa ka ïoh ka kot ka Ri.

Ka seng ha ka shithi ba la phah sha u Myntri Rangbah ka jylla u Conrad Sangma ka la ba ha kajuh ka por ka sorkar Pdeng ka la kyntu ïa ki jylla ban pynduna ïa ka VAT halor ka Petrol bad Diesel kaba nang pynjem ïa ka jingeh kiba pyndonkam umphniang bad da katei, la ïohi ruh ba bun na ki jylla ki la rai ban pynduna ïa ka VAT bad ki la lah ban pynduna ka dor Petrol bad sha ka T. 100 bad T. 90. Baroh ki jylla ka thaiñ shatei lammihngi ki la shim kajuh ka rai kumba la pynbna da ka sorkar Pdeng.

“Hynrei ka sorkar Meghalaya ka dang pyrkhat ban pynbna bad halor kane, ka dor ka Petrol bad Diesel hapoh Meghalaya, wat hadien ba la pynduna ïa ka Excise Duty, kan dang ïai long ha ka dor kumba bad palat T. 100/- bad T. 90/- shi litar.
Namar kata, la kyrpad rit ïa ka sorkar ban shim ka rai ba biang ban pynduna ïa ka jingjynjar jong ki paidbah da kaba pynduna shuh shuh ïa ka VAT ha kaba die ïa ka Petrol bad Diesel,” ong ka shithi ba la soi da u General Secretary HYC CEC Bah Roy Kupar Synrem.

U la ong ba ka seng ka kyrmen bad kyrpad ba u Myntri Rangbah un pdiang kaba long na ka bynta ki nongshong shnong ka jylla, khamtam eh ha kine ki por ba ktah bha ka ïoh ka kot, pynkut ka shithi na u Bah Roy Kupar Synrem, General Secretary HYC CEC.