Thung dieng ka CORP bad ki khynnah skul ha Byrnihat

Shillong, 9 Jylliew:
Ryngkat shityllup ka pyrthei ka Confederation of Ri Bhoi People (CoRP) Byrnihat Circle ka la rakhe ia ka “World Invironment Day” ha ka sngi Thohdieng ha ka skul Suryodaya Secondary School ha Mawsmai, Ri Bhoi District.
Ha kane ka sngi, la pynlong ruh da ka jingiaid paidbah kaba la sdang na ka skul St. Jude 12 mer Byrnihat bad iaid ha ka surok four-laning lyngba ka Jorabad sha Mawsmai ha kaba saw tylli ki skul na katei ka thain ki la iashim bynta lang ryngkat ki placard kiba la thoh kumno ban pynneh pynsah ia ka ‘mei mariang ha ryngkat ka pyrta “Save Trees, Save Life”.
U MDC ka Jirang Konstitwensi, Bah Victor Ranee ula long u Kongsan uba la shim bynta ruh ha ka prokram thung dieng ha ka jingiadonlang u Bah Bandari Ryntathiang, Working President ka CoRP, Bah GS Hat Finance Secretary ka CoRP, ki nonghikai ki riew rangbah lem bad ki khynnah skul, katba ia ka jingialang la pyniaid da u Bah Bishar Khongkliam President ka CoRP Byrnihat Circle.
U Kongsan haba ai jingkren ula ong, ba ha ka 5 tarik u Jylliew man ka snem ka Jylla ryngkat ka Ri baroh kawei ka juh rakhe ia ka “World Evironemnt Day” kum ka sngi ba kyrpang ban thung dieng ban pynjyrngam ia ki khlaw kiba la sdang synlen na ka jingpom dieng pathar.
Ula ong ia kane ka sngi la pynbna da ka UNO ha u snem 1973 na bynta ban pynjyrngam ia ki khlaw da kaba thung dieng hadien ba ki iohi ba ka jingpynjot bad julor ia ka mariang ka la wanrah jingma ia ka jingim ki briew.
“Ka jingpom pathar ia ki dieng bad thang rnga ka dei ka dawbah ba la pynjot pynjulor ia ki mei mariang ha ka jylla, bad kane ka dangiai bteng haduh kine ki sngi ban khaii tuh ia ki dieng bad u rnga ha ki karkhana hapoh ka jylla bad shabar jylla”, ula bynrap.
U Bah Ranee ula ong, ba u briew u donkam ia ka lyer khuid ban ring mynsiem man ka sngi bad um lah ban im khlem ki dieng ki siej, kumta ngi donkam ban shim ia ka jingkitkhlieh kum ki nongshong shnong ban tyngkai ia ka mei mariang.
Ula kyntu ia ki khynnah skul ban sam lem ia kane ka khubor sha ki paralok ha ki shnong jongki bad kiba hahing ha sem, ba ngi donkam ban thungdieng ban pynjyrngam ia ka mei mariang kaba don sa tang ki lum ba la synlen khnang ba kan ym ktah ia ka jingim ki briew bad ki jingthaw kiba don ha ka.
Ha kane sngi la pynphuh pynphieng ia ka prokram da ka kolshural show ki jingshad bad ki skit da ki khynnah skul bapher bapher.
Ha kajuh ka por, ka skul Lillte Star ka la rah ia ka nam bayngkong ha ka jingthoh slogan, ka St. Jude ba-ar bad balai ka St. Savio Baridua bad Suryodaya, katba ha ka kolshural show ka St. Jude bad Suryodaya banyngkong, ka Little Star ba-ar bad balai ka Talen Hunt Committe.