Ka jing kiewdor bad ka jing kamai jong u briew

Ka jing kiewdor, ha kine ki sngi, ka la jubor shi katdei bad ka long kaba sngew sangsot ia u paidlang jong ka jylla, ba un tyllun ia kamai kajih, ka ioh ka kot jongu, ha kane ka jingkiew dor kaba wut shi wut.

Ka sorkar India, ka la pheil, ia la ka jong ka bynta halor kane ka mat, namar ba ka plie lad ia ka jing kiew dor, hynrei kam shym la plie lad ia ka jing ioh bylla ne ka jing ioh kamai jong u briew bad dang ha ki khyndiat sngi ba ladep, ngi iohi, ia ka jingkhein, kaba pyni, ba ka India, ka don ha ka kyrdan kaba 101, halor ka jingduk tasam, lane ka jing bym ioh bam thikna jong ki nongshong shnong, ha kaba ka hiar shatrai jong ka Bang ladesh, Pakistan bad kiwei ki ri, ba marjan.
Ka mat hangne, ka long, ba u misteri, u lah ban ioh bai nong san spah shi sngi bad ia katei ka bai nong, un nym lah ban pyn kylla man la ka taiew, man la u bnai lane man la u snem ruh bad lada khein ia katei ka 500 jongu, u hap ban ia bynta, ia ka bai met jongu, kaba u trei shitom, kaba u hap ban pynlang pisa ialade, ban sumar ia ka met, ban pynlut ha iing ha sem bad haba khein ia ki jinglut jingsep bad ka jing ioh kamai jongu, kaba eh, ka long ba hadien ka jinglut, ialade pat um don jingmih eiei shuh, lane ha ka jingkhein ka economics, ka pyni, ba ka jingmih kam iahap shuh, ia ka jingtrei ka bor met, ka bor jabieng jongu.

Ka dei kane kein ka mat, kaba ka sorkar India, ka donkam ia ki economist kiba tbit, ba kan shim jingkhein thik thik, ia ka jingmih ka kamai kajih jong u briew bad nangta ia ka jinglut, kaba u pynlut bad nangta ia ka jing donkam, kaba un hap ban sumar bha ialade lane ia la ki khun; hynrei kumba ka paw mynta, la iohi, ba ka sorkar ka klet noh ia ka met jong u briew, hynrei, ka kynmaw ban sumar tang ia ki tiar, ha kaba lada thied kali, thied mashin, ka don ka ram bad ba hap ban siew ia ka ram ka shah, katba ia ka ram jong ka jingtrei jong u briew, ym don ba khein eiei ruh.

Kiba don ha ka sorkar, ki ioh lad ban khein dor ialade, da kaba pynkiew tulop, katba kum ka jing iaid jong ka por; lait nangta, kiwei ki nongtrei kam lajong, ki nong bylla, kim don jingkhein eiei bad ka jingtrei jubor jongki, ka pynmih ia ka jingeh ia ka koit ka khiah jongki, khamtam ynda ki la noh ka rta.