Iakhih ki samla pule Kiang Nangbah, bym suidniew ka sorkar

Jowai, 8 Jylliew: 
Ki samla pule ka Kiang Nangbah Government College ha Jowai, mynta ka sngi ki la pyn long syndon da ka jing iakhih na ka daw ba ka sorkar jylla khamtam eh ka tnad Higher Technical Education jong ka sorkar kam shym la pathiaw satia ia ki shi khrum ki jing dawa na ka bynta ban pynbha pynmiat bad ban kyntiew kyrdan shuh shuh ia katei ka college.
 Ki samla pule hapoh ka lama jong ka KNGCSU ki la khang tala ia baroh ki karma class na ka bynta ban pynrem jur ia ka sorkar kaba la ieh khuswet ia katei ka skul bah jong ka NEHU ha West Jaintia Hills District.
 Ka KNGCSU ka la buh ia ki jingdawa ha khmat ka sorkar kiba kynthup ia ka jingdawa ban shna lane tei ia ki kamram class ban iarap ia ki samla pule ban lait na ka jingkhapngiah, ka jingplie ia ka Hostel Kynthei, ka jingmoramot ia ka Hostel Shynrang nalor kiwei kiwei.
 Dei halor ka jingbym patiaw bad sngap mynthi ka sorkar ba ka Student’s Union ka la pynlong syndon da ka jingiakhih.
 Hadien kumba hynriew kynta ka jingiakhih, u Additional Deputy Commissioner, WJH, u ma CS Laloo u la wan ban iakren bad ki nongialam ki samla Pule Kiang Nangbah bad hadien ka jingiakren bad utei u heh District, ka KNGCSU ka la rai ban weng noh shwa shipor ia ki jingiakhih jong ki.
“Ngi la weng shipor bad ngin sa ia khih biang lada ka sorkar kam shym la pathiaw lane ka shukor ia ngi”, la ong u samla Jersom Shylla.