La kut ka iakhroh briew, ha ki 3 Constituency

Ka 27tarik, ka dei ka sngi kanbas kaba kut, ia ki kandidet ha ki 3 tylli ki Constituency, ki ban leit sha ka elekshon jied MLA thymmai.

Ka la dei ka jing ia trei shitom, kaba rad bah, naduh kaba sdang jong U Risaw 2021, ha kaba la pynbna ia katei ka elekshon, ha ki 3 tylli ki Constituency, ha kaba ki seng sain pyrthei bapher lem bad ki kandidet, ki la ia trei bor bah, ban lum ia la ki nong kyrshan, na bynta ka sngi thep vote, ha ka 30tarik Risaw 2021.

Kumba ka ju long, ka elekshon ha kane ka kynti, ka la iaid da ka jing ia kren tohmet, ka jing ia wohnia kaba la biang hi, hapdeng ki seng sain pyrthei bapher bad katei ka jing ia wohnia, ka la poi ruh pynban sha ka jing iakren khyllung, kaba ki riew shemphang lane ki snar politiks, kin nym sngew bang satia ban sngap.

Ka jing kynnoh ia ki kam tuh jong ki nongialam jong ka sorkar NPP, UDP; na u heh duh jong ka seng Congress, ka dei ka jingkren, kaba la khor shibun bha, ha kaba u pyni, ba kitei ki seng, ki dei kiba kamai pisa tuh na surok bah.
Kam dei tang katta, U Ma Vincent Pala, u ju kynnoh bun phew jait phew skit, ia ki nongialam jong kane ka sorkar Jylla, ha kaba iadei bad ka jingkit tuh dewiong, kaba ki nongniah ki hap siew T.1lak.

Kane ka sobjek, kam dei ban shu kut tang ha ka jing iakren, hynrei U MP, kumba ula sei madan ha Lok Sabbha, halor ka jingdon ki khyrdop lum pisa beain, ula dei ruh ban ujor sha kashari lane ban sei biang ha Parliament, halor kitei ki mat haneng.
Ka jing kanbas ha kane ka kynti, ka kham khor shibun, na ka liang jong ka Congress pyrshah ia ki seng synrop jong ka MDA, wat la ka jing ia wohnia, kam duh satia, wat hapdeng kitei ki kynhun synrop ka NPP, UDP.

Kumba ka jing kanbas paidbah, ka la kut; ka jabieng jong ki nong thep vote, ka la dei ban thanda bad ha kine ki ar sngi, ban sa wan, kin ioh lad ban shim ia ka rai, ban jied ia la ki jong ki nong mihkhmat thymmai ha kitei ki Constituency; hynrei ka don tang kawei ka mat bad kata ka long, ba ka jing ia wohkjat than ia kiwei, ka ju wan rah pynban, ia ka jing ia sngewsih, kaba pynneh ia ka sohkhliang bad katba ka jia, kitei ki Constituency, ki donkam ia u riew kren, u ban leit sha ka iing dorbar, ym dei u ban shu leit peit kai ia ki saw kynroh jong ka.