Ka ain, ban ai bhah ia ki khun shynrang, pynkhreh ka KHADC

Shillong: Ha ka jingialang jong ka Executive Committee, la ia kren sani halor ki artylli ki Bill, kiba na ka liang ka EC ka don jingthmu ban wanrah hapoh ka ingdorbar ka ban sa long ha ka 8 tarik u Naiwieng, kiba la tip, kum ka Khasi Hills Autonomous District Khasi Inheritent of Property Bill 2021 bad ia ka Village and Town Development Council Bill.
Haba ia kren bad ki lad pathai khubor na ka liang u Chief Executive Member (CEM) ka Khasi Hills Autonomous District Council (KHADC) u bah Titos W Chyne u la iathuh ba ka ne ka Bill ka long ban ai pateng ia ka hok jong ki kmie ki kpa ia baroh ki khun.

“Kam ju don ka jingai bhah ia ki jingdon jingem jong ki kmie ki kpa lane jong ki briew ba don tang ki khun shynrang lane ia kito ki briew ki bym donkhun (iapduh) ha ka ba ki ju mih shibun ki jingeh ki ba ju wan rah ia ka jingsngewsih haka ba ia dei bad ka ne ka jingioh pateng” u la ong.

U la bynrap “Ki don ki case kiba dei ki kur kiba ia knieh ia ki jingdon jingem ki don ki khun ba ki hap ban ia leh mukotduma bad la ki kmie ki kpa don ki hynmen ki ia leh mukotduma bad ka para khadduh, ha kaba na ka liang jong nga, nga la wan rah ia ka ain ka ban lah ban pynbit pynbiang lang ia baroh”.
U bah Chyne u la ong ba kaba kham ia ban ha ka ne ka ain ka long ba ka jingiasam ia ka bhah ka dei ban long mar katjuh ia ki khun kynthei bad ki khun shynrang, hynrei kane kan shong ruh kat kum ka kot pynkam (Will).

“Ha kane ka ain ka la buh beit buh ryntih, ha kaba ia dei bad ki khun kynthei, khun shynrang kiba tamsneng na ki kmie ki kpa, kiba ioh lok khyllah jait kiba la bud ia ka riti dustur ki wei yn ym lah shuh ban ai ki pateng jong ki kmie ki kpa” u la ong.
U la ong ba kane ka ain kan ban jur na ka bynta ban ai ia ka bhah ia ki khun shynrang na ka jingdon jingem jong ki kmie ki kpa.

U bah Chyne u la pynshai halor ka Village and Town Development Bill da ka ba ong “Kane Bill ka long na ka bynta ban shna ia ki Village bad ki town Council ki ban khmih kyrpang na ka bynta ki kam pynroi. Ka Development Council yn khlieh da U Rangbah Shnong bad kiwei ki nongkitkam ki dei ban jied lyngba ka election bad ka por trei kam jong kane ka Council kan long 5 snem bad ki ban ia shim bynta kin dei ki nongshong shnong ba pura ki ba don ban shim bynta ban jied ia ki MDC,kin ioh ia ka lad ban jied ia ki dkhot jong kane ka Council”u la ong.