Tied jingkhang U bah Pyniaid shaduh Delhi, na ka khyrdop Mawshbuit, ong u bah Sanbor

Shillong:U Bah Sanbor Shullai, MLA ka BJP na Shillong South uba dei ruh u Myntri Sorkar Jylla, u la ong ba u Bah Pynïaid Sing Syiem, MDC ka Sohryngkham bad uba bat ia ka kam kum Chairman ka Khasi Hills Autonomous District Council (KHADC), u la shim khia ban leit shaduh Delhi ban kyrpad ia ka tnad ïada Ri ka Sorkar India ban weng ia ka jingia kynduh jingeh ki paidbah na ka jingdon ka khyrdop shipai ka 58 GTC ha surok ban rung sha ka shnong Mawshbuit.

Haba kren ha ka jingialang ïalap elekshon jied nongmihkhmat shiteng samoi sha ka Ïing Dorbar Thawain ka Jylla na Mawryngkneng, na ka bynta u Bah Pynïaid Sing Syiem na ka National People’s Party, u Bah Sanbor u la ong ba kum u MDC u la leh ia ka kam ka ban long ka jingmyntoi na ka bynta ki paidbah ka thaiñ Mawshbuit. “U la wan ban ïakynduh ia nga ban phah bud dien lem ia kane ka mat jingtyrwa sha ka tnad Ïada Ri”, la iathuh u Bah Sanbor.

U la ong ba ka jingmih na kane ka jingleit ïakren bad ka tnad Ïada Ri ka long ba dang shen, ka la don ka jingjurip lang bad ki ophisar ka tnad Ïada Ri na Guwahati na ka bynta ban weng pynkynriah ia katei ka khyrdop kaba la long ka jingpyndik ia ki nongleit nongwan, ym tang na katei ka shnong, hynrei ia kiwei pat kiba iaid ba ïeng sha katei ka jaka ha ki bor pahara ka 58 GTC.

Da kaba kyntu ia ki paidbah ban jied ia u Bah Pynïaid ha kane ka elekshon jied nongmihkhmat shiteng samoi, u Bah Sanbor u la ong ba ki paidbah ki dei ban pyndonkam ia ka jingstad, ka jingshemphang bad jingkitkhlieh na ka bynta ka jingkyrmen ka Mawryngkneng Constituency naduh ka 2 tarik u Naiwieng, 2021 kaba dei ka sngi ñiew ia ki vote.
U Bah Pynïaid haba ai jingkren, kum u kyrtong u la ban jur ba u ïeng iakhun ia kane ka elekshon halor ki nongrim ban kyntiew ia ka roi ka par, ki jingdonkam ki paidbah nongshong shnong ha ka Constituency hi baroh kawei. Da kaba ai khublei ia u Bah Sanbor halor ka jingthmu ban pynkynriah ia ka khyrdop 58 GTC, u la ong, “Ka dei ka jingïatreilang na ka bynta ban weng ia ka jingeh ki paidbah nongshong”.

U la ong ba kum u MDC la hynñiew snem, u la pyrshang ban tied jingkhang sha Secretariat na ka bynta ki kam pynroi ha ki shnong ki thaw. “Ai ia nga kane ka lyngkor ngan kit ban shakri ia phi ki paidbah”, la ong u la ong. Da kaba kdew ba u angnud ban wanrah ki lad ai jingshakri ha ka koit ka khiah, ka um bam um dih, ka pule puthi bad kiwei ki kam pynroi, u la ong, “Nga angnud ban thaw ki lad ki lynti na ka bynta ki samla ha kane ka pyrthei kyrduh kam kyrduh jam”.
Da kaba kdew ba ki daw ba kongsan ki dei ki jingeh kiba u ïohi ia ki jingeh ha ka Constituency kum ki nongrep bad nongbylla sngi, u la ong, “Kane ka dei ka daw ba nga mih sha khmat bad nga lap ba ka ïoh ka kot ka duna palat ha ki nongshong ha ka Constituency la ki dei ki nongrep ne ki nongbylla sngi. Nga pyrkhat kumno ki pyndap ia ka ïing ka sem bad kum ha kane ka shnong nga lap ba bun kiba duk ba jynjar”.

U la ong ba u phai khmat ban kyntiew ia ka kam ri jingri ban kyntiew ia ka ïoh ka kot ha ki nongshong shnong. Kiwei kiba la ai jingkren ha kane ka jingialang ki kynthup ia u Bah Sostheness Sohtun, MLA ka NPP na Jirang, u Bah Victor Ranee, MDC ka Jirang, u Bah Pynehborlang Mukhim, President ka UDP Mawryngkneng, ka Kong C Kharkongor bad kiwei kiwei pat.