Kyntait ka KHADC, ia ka building bye law jong ka sorkar jylla

Shillong:U bah Paul Lyngdoh, U EM in charge ka Building byelaw jong ka KHADC, u la ong ba na ka liang jong ka EC ka la kyntait ia ka Buiding Byelaw 2021, kaba la ai ka jingithuh da ka tnad Urban Affair jong ka sorkar jylla.

Haba ia kren bad ki lad pathai khubor, na ka liang u bah Lyngdoh, u la ong ba shuwa ban pynwan dur ia kane ka Building Byelaw la dep ban khot ia ka jingialang lai sien ha ka ba la kynthup lang ia ki dkhot ka KHADC, GHADC bad JHADC.

U la iathuh ba ha kane ka jingialang, la dep ban ia kren ia ka jingiaphiah ia u pud trei kam jong ka Sorkar jylla ha kaba kan pyntrei trei ia ki Building bylaw tang ha ki Municipal areas, ki skim Areas, Master plan areas bad ki jaka ba hap jong ka sorkar jylla lait na kine baroh ki dei ban trei kam da ki ain ka District Council.
“Hynrei kaba pynlyngngoh ka long ba kat kum ka Copy ba la pynmih ia ka Meghalaya Building Byelaw 2021, kaba ia pher shibun ia kaei kaba ki la dep ban ia kren ha kine ki jingialang”u la ong.

“Naduh 2019 ka sorkar jylla ka la dep ban ithuh ba ka District Council kan don la ka jong ka bor ban pynmih ia ki jingai jingbit ia ki building ha ki jaka kiba lait na ki jaka ki ba hap ha ka sorkar jylla hynrei ha kane ka Building ByeLaw 2021 ka mih thik tang ha ka bynta ba ha khmat tam ha ka Gazzete lait nangne ha ki sla, ba hadien khlem kren eiei ia ki bor jong ka KHADC”u la bynrap .

“Nalor jong kine ki jaka, kiba ka byelaw jong ka sorkar ka lah ban pyntrei kam, hynrei la buh ia ka wei ka kyndon ka ba ong ba kano kano ka jaka kaba don 50,000 sqft shaneng ia ka jingai jingbit na ka bynta ban shna building kan leit sha ka kti ka MUDA wat la ka dei ka jaka ba hap hapoh ka District Council” la ong u bah Paul.

Kane ka byelaw jong ka sorkar ka ong ruh ba ka jingbit ia kine ki application jong ki paidbah la buh ba yn lah ban ai jingbit tang ki Engineer bad Architect kiba la don ia ka PhD na ki University kiba la don ia ka experience ka ba long 10 snem. “Kiba kum kita ki briew yn ym lap ha Meghalaya wat ha Northeast ruh bad kane ka long ka ba ym lah ban long ha ka ba na ka liang ka EC ka la kyntait ban pdiang ia kane “la ong u bah Paul.