La pynskhem ia ki nongialam ka Synjuk ki Dorbar Shnong Byrnihat Area

Nongpoh: Ka Synjuk ki Dorbar Shnong Byrnihat Area, ha ka sngi saitjain, ka la ioh ban pynskhem pura noh ia ki nongkitkam ba thymmai jong katei ka Synjuk. Ia katei ka jingpyn skhem ia kitei ki nongialam katei ka Synjuk la pynlong ha Byrnihat Auditorium bad kiba la sakhi lang ha katei ka sngi, ki kynthup ia u Pa’iem Ken Syiem, Syiem ka Raid Marwet, nangta u Pa’iem Wanphrang Syiem Sirdar ka Elaka Nongpoh Sirdarship, ha ryngkat ka jingdon kiwei ki nongialam Raid bad ruh ki rangbah shnong na 30 tylli ki shnong kiba hap ha Byrnihat Area, kaba sdang na 12 mer haduh 18 mer.

Ki nongialam jong katei ka Synjuk kiba la shah pynskhem hynne ka sngi, ki kynthup ia u Bah Kendrowell Lapang, kum u Chairman ba thymmai ka Synjuk, uba la mih bujli ha ka jaka u Bah Francis Lapang, nangta u Bah Jeslin Syngkli kum u Vice President, u Bah Johny Syiem, kum u General Secretary, u Donhok Kshiar Asst. Secretary, John Marak Treasurer lem bad 8 ngut ki dkhot ka Executive Member.

Haba shim kyllum ia ka jingkren jong u Pa’iem Wanphrang Syiem bad u Bah Ken Syiem, ki la pynpaw ba ki kmen eh ban iohi ia ka jingialong tylli jong kitei ki 30 tylli ki Dorbar shnong, ha kaba ki la thaw khnang ia katei ka Synjuk, na ka bynta ban wanrah ia ka jingiaieid iajan hapdeng ki para nongialam shnong, khamtam eh na bynta ban iakren halor shibun ki mat kiba iadei bad ka jingdonkam ki paidbah ha katei ka thain.

Ki la kyntu ia kitei ki nongialam ba thymmai jong katei ka Synjuk, ba ki dei ban long kiba iatylli bad khamtam eh ba kitei ki shnong ki don ha khappud bad ka Assam. Ki la kyntu ruh ia ki nongialam ka Synjuk ba ki dei ban pyni ia kata ka nuksa kaba bha bad ruh ban shimkhia ha ka ban pynnneh pynsah ia ki Riti Dustur, khnang ba ki briew kiba don ha ka liang Assam, ba kin iohi ba ki shnong Khasi bad Garo kiba don ha katei ka thain, ki long kiba iatylli bad ruh kiba don la ki jong ki Riti Dustur.