Ujor sha U SMR, ba thied trok ki kompeni dewbilat haduh 500 tylli

Shillong:Ki dkhot jong ka Meghalaya Trucker’s Union, ki la ia kynduh ia u symbud myntri rangbah ka Jylla, u bah Prestone Tynsong, namar ka jingeh ia ki nongniah truck trai jylla na ka jingthied truck hi ki Cement Company kaba la buh jingma, ia ka kamai kajih jong ki trai jylla.

Haba ia kren bad ki lad pathai khubor na ka liang u bah Raiwan Sohtun u General Secretary, ka MTU, u la ong ba ki nongniah truck trai jylla man ka por hi, ki la ju pynlong ia ka jingiakhih na ka daw ba ki Cement Company ki ju nion beain ia ki. La ka dei ha ka dor kit, dang shen na ka liang ka sorkar ka la dep ban tuklar bad ki la poi sha ka jingiasuk.
“Hynrei mynta ka kynti ka la mih sa kawei ka jingeh ha ka ba kine ki Cement Company, ki la thied hi da ki spah tylli ki truck ha ka ba tang ka Star Cement ki la dep ban thied ia ki 250 tylli ki truck bad ki dang order sa 250 tylli ki truck bad kane ka jingthied truck jong ki Cement Company ka buh ia ki pliang ja jong ki nongniah truck trai jylla ha ka jingma namar ba kan ktah shibun”u la ong.

U la iathuh “Ha kaba ia dei bad kane ka bynta na ka liang ka MTU ka la leit ban ia kren bad ki Cement Company ban dawa na kine ki Company ba lada ki thied ia ki truck ruh, hynrei ki dei ban ai ia ka hok jong ki trai jylla kim dei ban pynduh bad ki dei ban ai da ka bhah ka ban long 85%”.

U la bynrap shuh shuh “Ha kaba ia dei bad kane na ka liang ki Cement Company ki la shu sngap jar ha kaba, ka la pynlong ia ka Union ban wan ud ia ka ne ka jingshah nion bein ha ka sorkar jylla ba kan tuklar lang khnang ba ki trai ri trai jylla kin ym duh ia ka lad kamai jakpoh”.
U bah Sohtun u la iathuh, ba na ka liang u symbud myntri rangbah u bah Prestone, u la kular ia ki ba ynda la kut ka ne ka election shiteng samoi, un sa khot ia ka jingialang bad ki cement Company ban ioh ban pynbeit ia kine ki jingeh.
U bah Sohtum u la ong ruh ba na ka liang ka Union, kan ap haduh ban da kut kane ka election shiteng samoi bad lada kam shem lamih kano kano ka rai na kane ka jingialang ka ba ka sorkar kan sa khot hadien kane ka election na ka liang ka Union kan sa shim da ka sien jam ban iakhih, kaba khlem buhpor.