Khyrwit naphang U MP, ha kine ki sngi

U Ma Vincent Pala, MP, ka nongbah Shillong, u don ha ki kotkhubor, la jan man ka sngi, ha kine ki sngi bad kata ka long, ba u sangoh ia ka sorkar jylla, halor ki ki jing kynnoh jongu, ba ki dei ki kam beain, ne ki kam bamsap bapher jong ka jylla.

Ngim tip, na kano ka daw, ba u kren shongshit katne katne bad na kano ka daw ruh, ba u kwah ban sympat, da u dieng jongu, uba heh bad uba eh ia kine ki MLA bapli, kiba ka jingkhlain bor jongki, kam shong satia, wat tang ha khohwah jongu ruh.

Ngi tip shai, ba U MLA, u dei ban ia tai nia ha ka iing dorbar jylla, U MDC ha ka iing dorbar jong ka District Council bad U MP, u dei ban ia tainia ha Parliament, lane ha kawei ka kyntien ban iatainia pyrshah ia ka sorkar India, lane ka sorkar BJP ha Delhi; hynrei, lada jia ba U MP, u tuklar noh ia ki ishu ka sorkar jylla, kumta mano pat ban iakren ia ki ishu ka jylla, kiba don jing iasnoh bad ka Delhi.

Ki don bun bah ki ishu jong u paidlang ka jylla, kiba donkam ban tied da u nem bah ha khmat ka sorkar India bad kita ki long halor ka ishu ILP, halor ka ktien Khasi, halor u pud u sam, halor ka khaii pateng bad ka Bang ladesh, halor ka thungkam thung jam ha ki ophis sorkar India bad bun bah kiwei pat, kiba dei ban ther tyngeh, hynrei ia kitei U MP, ula buh noh shadien bad u kham sngew bang ban ia kynthih lang ha i pung iba rit bad ban pyn ia ryngkat kyrdan ialade bad ki MLA.

Halor ka petrol, diesel, u sngew bang ban sangah tyngeh ia ka sorkar MDA ha Meghalaya, haba u tip bha, ba ka sorkar India, ka tangon da ka khajna kaba heh bha, halor ka dor petrol bad ba ka jing kiewdor, kam dei tang ha kane ka jylla, hynrei ha kylleng ka Ri.

Ka sorkar India, ka nang nion, da ki ain bapher jongka, sha ka jylla, namar ba ngi ioh, ia kum kine ki MP, kiba sngap man man bad kiba kwah ban lushia ia ka jing trei kam ki MLA bad ki MDC bad ia kata ngi iohi, ba ia ka ishu ki shipai ha Mawshbuit, hap leit iakren da u MLA na South Shillong, nangta ngi iohi, ia ka ishu ban nang pynheh ki karkhana dewbilat, ba la tuklar hi noh da ka sorkar India, nangta sa ka kam dewiong, kaba la hap ban ioh jing mynjur na Delhi, ka jing pyn khlain bor ia ka 6th Schedule bad sa shibun kiwei pat, kiba la nang dkhat ia ka bor ki Jylla.