LANO PAT???

P.B.S

[ba bteng] “Ho-oid, kein te yn leh kumno. Tharai haduh 5 ne 10 snem kan wan ka kylla” la ong u kpa u Ksan.
“To, thiahsuk baroh. Nga la samthiah” u la ong bad rung sha kamra kyndong.

“Phi lah biang hep, ka nep?” la kylli ka hynmen.
“Ho-oid, lah biang” u la jubab.

LYNNONG – 10
La mih u nai Jylliew. Ha une u bnai kumba ju long, ka resol klas XII bad matrik ki shait mih. Ha ka 2 tarik bad 5 tarik uta u bnai la pynmih shwa ia ka resol jong ki science bad ki commerce. Dei ha ka 11 tarik uta u juh u bnai la pynmih ia ka resol jong ka Arts stream.
U nongsam khubor u la wan ai khubor ha iing u bah Sokon. Kumta kumta hi ki la peit lang bad la shem ba u Bhalang u ioh Merit List ha ka kyrdan kaba san na ki Tribal List. Da ka jingkmen u la doh ia la u Kni, ka Nia, ki khun jong ka baroh. U bah Sokon u da kmen eh ba u pyrsa jong u u tyngshain bad ha ka jingpule.

Ynda la dep bamja, ma u ha ryngkat bad u Kni ki la leit mih sha skul. Tang shu rung u Bhalang ha skul, ki nonghikai ki la kdup ieit ia u bad ki khynnah skul ki la ai khublei jingjop. U Principal lei lei u la kmen palat bad u la kdup ieit bad thap ieit ia u Bhalang ba u la pyndonburom bad pynpaw nam ia ka skul. Ha kata hi ka sngi, u Principal u la wah notis ban pynkup burom ia u Bhalang ha ka sngi kaba bud ka ban long ha ka por 10 baje mynstep. U Principal bad ki nonghikai ki iakren ia u bah Sokon bad ki da iaroh ka jingstad u pyrsa jong u.

U Bhalang u la phun sha shnong ban pyntip ia kata ka khubor kaba kmentam. Ka iing jong u hi baroh kawei ki la kmen palat.
Ha ka sngi kaba bud, kaba dei ka sngi pynkup burom ia u, baroh na iing u mama ki la leit lang. La pynshong ia u hakhmat jong ka Hall jong ka skul.

La sdang ia ka jingleh burom ha ka por kaba la buh thik. La ia don lang ki nongkitkam jong ka Managing Committee jong ka skul, u Principal, ki nonghikai, ki nongtrei ka skul bad ki khynnah skul baroh. La dap smam ka hall, u Principal u la iathuh ba kiba ialeh baroh na skul ki long 42 ngut. Kiba pass 39 ngut. Kiba poi first div 6 ngut, second div 26 ngut bad third div 6 ngut bad u Bhalang u dei uba pas bha tam da kaba ioh Merit List ha ka kyrdan kaba 5. Ki la thap kti jam baroh. Ka skul ka la pynbeit ba ia kiba poi First div yn ai mar T500 tyngka bad ia u Bhalang uba la wanrah kat kata ka nam ia ka skul la ai T5000/- tyngka. La khot kren ia u Bhalang. U la ai nguh nyngkong eh ia u Blei bad ia kiba haiing hasem, ia ki nonghikai bad ia u Principal kiba iai ai mynsiem na ka por sha ka por. U la kyntu ia ki para khynnah skul ba dei ban khreh kot da ka Time-table kumba u leh bad ka jingbuh ia ka thong ha ka jingim. La pynwai da ka jingiadihsha sngewbha tang kum ki dak ka jingkmenlang.

Kata ka sngi kan iai long kum ka jingsah jingkynmaw ia ka skul hi baroh kawei. Kumjuh ruh ka iing u mama u Bhalang kin nym lah ban klet ia kata ka sngi ba u briew uba sah ha iing jong u un pyndonburom haduh katta ia ka skul bad ia ka iing jong u.

Ka jingsah jingkynmaw kaba khrawtam ka dei ia u traimet, kata ia u Bhalang. U sngew kata baroh ka dei ka jingleh phylla u Blei ba ha kajuh ka snem un ioh ia ka kam sorkar watla ka dei shwa ka kam ‘peon’ bad sa kawei pat ka dei ka jingioh Merit List bad ka jingshah pynkupburom kaba um mutdur bad um phohsniew ba kan long haduh katto. [yn dang bteng]