Kam trai ka kynhun Lashkar-e-Taiba, ba siat iap ia 2ngut ki Bihari, hukum ia ki bar jylla, ba kin mih noh na them Kashmir

Ka kynhun kaba mih khmat ia ka Lashkar-e-Taiba, kaba la tip, kum ka United Liberation Front, ka kam trai, ba ka la pyniap bein ia ki arngut ki nong bylla kiba na Bihar, ha Kashmir. Katei ka seng ehrang, ka byrthen tyngeh ruh, ia ki nong bylla bar jylla, ba ki dei ban mih shi syndon na ki them Kashmir.

Hynnin ka sngi, ki ehrang ki la siat iap ia arngut ki nong bylla bad ki pyn mynsaw ia uwei pat ha Kulgam, kaba don shathie jong ka Kashmir. Kane ka dei kum ka jing iai bteng jong ki ehrang, ban hiar thma ia ki briew kiba nabar ha Jammu and Kashmir.

Ka jingshah pyniap jong kitei ki 2 ngut, ka dei ha ka sien kaba lai, kaba la jia ha kajuh ka sngi. Ha ka sngi saitjain, uwei u nong bylla na Bihar bad u misteri na Uttar Pradesh, ki la shah pyniap ha ka sngi saitjain.

Mynta u bnai, ki la don 11ngut ki briew, kiba la iap ei ha ka jingshah hiar thma ha ki ehrang ha Jammu and Kashmir.