Shah kem u dkhot ka HNLC

Nongstoin, 4 Jylliew:
Hadien ba la ioh jingtip kaba paka na ki bor syntiat ba u don u dkhot jong ka Hynniew trep National Liberation Council (HNLC), ha ka Shnong Mawlangsu, ki pulit ki la hiar wut wut sha katei ka jaka ban pynlong ka jingkhynra ha kaba ki la ioh kem ia uwei u dkhot ka HNLC u ba la tip kyrteng kum u Sromwell Mawdoh na ka shnong Laitkseh uba dei ruh u Headmaster barim ka Lai shnong Secondary School, Mawlangsu kaba don ha West Khasi Hills. U dei u dkhot uba dang shu leit pyniasoh shen sha katei ka seng. Utei u Headmaster barim katei ka skul u dei uba la shah thwet jur ha ki Pulit.
U bah Mawdoh u la leit pyniasoh ialade sha ka HNLC hadien ka jingleit iasoh u vice president barim ka KSU u bah Frederick Kharmawphlang kaba dei ruh ka por ba dang khluit bha ka jingdawa ILP ki Sengbhalang. Ha ka por ba u leit ban pyniasoh ialade sha katei ka kynhun kieng atiar u bah Mawdoh u la ong “Nga kwah ban weng ia baroh ki jingialam bakla ha ki jingshah hikai hapoh ki skul ha kaba iadei bad ka History, kumjuh halor ka kolshor jong u khun Khasi Khara”. U bah Mawdoh mynta u don ha ka kti jong ki pulit ka Nongstoin bad la dep ban register case pyrshah ia u hapoh ka Nongstoin Police Station.