Ka NEHU kam donkam BSF, phah mih noh, ong ka KSU ia u VC

Shillong, 3 Jylliew:
Ka KSU-NEHU unit ka la pyrshah jur ia ka jingai lad jong ki bor ka NEHU ban pynsah ia ki shipai BSF haduh kumba 800 ngut ha phyl law kane ka skul bah.
“Ngi pyrshah jur ia ka ai bor jong ka NEHU ban wan sah ki BSF ha phyllaw kane ka skulbah kaba kylla long kum ka ktem ki shipai ha jaka ban long ka jaka pule ba pawnam. Ka NEHU kam donkam jingiarap eiei na ki BSF ne ia ki bor shipai”, la ong u president ka KSU-NEHU u samla Samuel Kharshandi ha ki nongthoh khubor hadien ba la wai ka jingiakynduh bad u Vice Chancellor ka NEHU hynne ka sngi.
Ka KSU-NEHU unit ka la dawa na u pro-vice chancellor ka NEHU ba dei ban beh krad noh ia ki shipai BSF kiba wan shong ha phyllaw kane ka skulbah.
“Ngi dawa ba dei ban beh noh ia ki BSF, namar ba kum ka skul bah kam donkam ia ki ba kin wan shong shipor ne junom hynrei ka dei ka jaka pule”, la ong u samla Kharshandi.
U la ong ba ka jingwan shong ki shipai BSF kan ktah ia ka burom bad ka ijot jong ka skulbah.
“Ka jingdon ki BSF ka la wanrah ia ka syier ia ki paidbah, ki samla pule ha jaka ban ioh ia ka jingshngain nalor ba kim don ka jinglong disiplin”, u la ong.
Kumno ki shipai BSF kiba dei ban leit pahara ia ka khappud, ki wan shong pynban ha phyllaw ka skul bah bad kane ka long kaba sngew thamula , la ong u president ka KSU.