Mynsaw ka samla ba shah syllad, ha kawei ka kali Assam ha Sumer

Nongpoh: Ha kawei ka jingjia shah syllad kali, kawei ka khynnah samla ba dang 23 snem ka rta, na ka shnong Sumer, Ri Bhoi, ka la mynsaw jur hadien ba ka la shah syllad ha kawei ka kali Honda Brio kaba don ia u number AS-01-BL-8603.

Katei ka jingjia, ka la jia hynne ka sngi ha ka por 1:30 ei ei, ha kaba katei ka kali Assam kaba la niah da u Dr. SP Sharma, ka dei kaba la wan na Guwahati da ka jingthmu ban kiew sha Shillong, hynrei haba la poi ha katei ka jaka, ka la kum syllad ia katei ka khynnah samla haduh ba kan da mynsaw jur.

U nongniah jong katei ka kali, haba u la kum syllad ia katei ka kali, u la pynkit noh mar mar ia katei ka samla sha Umsning CHC na ka bynta ban ioh jingsumar, hynrei namar ba la kham jur ka jingmynsaw, kumta la pynkit noh ia katei ka samla sha ki jaka sumar ha Nongbah Shillong, khnang ban ioh ia ka jingsumar kaba kham biang.