Yn nym ong shuh “Give and Take” ha ka iakren kam pud, ong u myntri

Shillong: U Chairman ka Regional Commitee ka West Khasi Hills District, u ba long ruh u Myntri ka tnad PHE ha ka sorkar jylla, u bah Renikton L Tongkhar u la ong ba nangne shakhmat hi, na ka liang ka Commitee kan ym pyndonkam shuh ia ka kyntien “Give and Take ” namar ba bun na ki paidbah ki pyrshah ia ka ne ka policy.

Haba kylli halor ka jingiakhih jong ki briew ba sah ha ki thain RiBhoi ban pyrshah ia ka “Give and Take” Policy u la ong ba ki nongshong shnong ha kane ka thain ki don ka hok ban pynpaw ia ka jingsngew jong ki, hynrei ki dei ruh ban sngewthuh ba kane ka jingleit jurip kam dei ka ba ka sorkar kan shim rai noh, hynrei ka dei tang ka bynta ba kan pyniaid shakhmat ia kane ka mat. U la ong ruh ba lada ki briew na ka thain jong u na West Khasi Hills District ruh ki kwah ban pynpaw ia ka jingsngew jong ki, halor ka jingpynbeit ia u pud u sam ki lah ban mih sha khmat ban pynpaw ia ka jingsngew jong ki,ngi pdiang sngewbha ia ki. “Ia ka “Give and Take lane ”Shim bad ka ai” na ka liang ka sorkar kan ym pyndonkam shuh, namar ba bun na ki briew ki pyrshah ia ka ne ka kyntien hynrei ha ba ngi kwah ban ioh ia ka lad ka lynti ban pynbeit noh ia u pud u sam hapdeng ka jylla Assam bad Meghalaya, yin hap ban ia burom iwei ia iwei, ngin hap ban iashong ha ka miej ban ia kren bad ngin hap don ka jingiamynjur lang lait na ka ne yn ym don shuh kano kano ka wei pat ka lad ban pynbeit ia u pud u sam”u la ong.

U la bynrap ba “Kumba nga la ong, ba ki briew ki la pyni ia ka jingbym ia hap halor ka Give and Take ha ka ba na ka liang jong ngi ruh ngin kyntait ban pyndonkam ia ka ne ka kyntien hynrei ngin sa ia kren bad ban mynjur ban ngin ia pdiang ia ka jingai jingmut jong ki briew kiba sah ha kine ki thain”.

U la ong ruh ba ka dei ka jingshisha ba ki briew kiba sah ha Shillong kin ym lah ban sngewthuh iaka jingmad jingeh jong ki briew ba sah ha ki thain khappud, ka jingshim ia ka sien jam ban leit jurip hi sha kane ka jaka ka long ban sngewthuh ia ka jingshem jong ki briew ha kine ki thain. Ki briew ha kine ki thain ki la kwah ban don noh ka jingpynbeit ia u pud u sam, ha kaba na ka liang ka sorkar, ka donkam ban burom ia kata ka jingkwah jong ki.