Da ki sur jingrwai, yn ialap iada mariang ka Pla Iew

Shillong, 3 Jylliew:
Ha ka sngi ban rakhe ia ka sngi jong ka mariang ne ka World Environment Day ha ka 5 tarik u jylliew ka Patners of Pla Iew Club ( P.P. Club), ha ryngkat ka jingiatreilang bad ka ophis u Deputy Commissioner, East Khasi Hills kan pyllait paidbah ia ka thup jingrwai kaba ki la ai kyrteng ka ‘Meghalaya Green Echos’. Ia katei ka thup jingrwai yn pyllait paidbah ha Don Bosco Youth Centre. Ha katei ka thup jingrwai kaba don 7 tylli ki jingrwai, ki sur jingrwai kin long ha ka ktien Khasi, Phareng, Hindi, Garo bad Jaintia.
Ki jingrwai ha katei ka thup ki long ka ‘Come Together’ ba la rwai da u bah Kupar Shadap na Nongthymmai, ka ‘Mei Mariang’ ba la rwai da ka kong Balasiewdor Ryntathiang na Mairang, ka ‘Pyrchang’ ba la rwai da u bah Lyngkitbait Lyngdoh bad ka ong Golda Lyngdoh na Jowai, ka ‘Nagon Bil Donga’ ba la rwai da u Raka Sangma na Tura, ka ‘We love Meghalaya’ ba la rwai da ka kong Ribhashisha Kharkongor bad u Edilbert Shane Kharbuki na Golflink, ka End Game ba la rwai daka kynhun Aberrant Metal Band, Shillong bad ka ‘Pla Iew’ ba la rwai da u bah Banker Kharkongor na Mawpat, Shillong.
U President ka PP Club u bah Nicholas J Kharnami u la ong ba ki jingrwai ha katei ka thup ka long ban ialap sha ki paidbah ia ka jingdonkam ban ri ban sumar kyndong ia ka mariang bad ban iada ia ki sawdong sawkun jong ka. Katei ka jingrwai ka dei ba katei ka kynhun ka la rwai kum ka jingsah kynmaw kyrpang ia ka kong Swor Kharumnuid (Bam kwai ha Dwar u Blei) ka kmie ieid jong u Nicholas J Kharnami ne u bah Manik kaba la shim nyngkong eh ia ka sienjam ban kyrsiew thiah na ka bynta ban iada bad pynneh pynsah ia ka mariang .