Tohkit ki pulit UP, ia u kpa bad 27ngut kiwei pat, ba ki bat bor ia ka khynnah Class 11

Ki pulit ka Uttar Pradesh, ki la shimti ban tohkit ia 28ngut ki briew, kiba donkti ban bat bor ia kawei ka khynnah Class 11, ha Lalitpur District jong katei ka jylla. U kpa jongka, uba dei ruh u heh duh jong ka Samajwadi Party (SP) jong ka Lalitpur district bad nangta sa U president jong katei ka district, na ka seng Bharatiya Samajwadi Party (BSP), ki dei na ki 28ngut kiba shah kynnoh, ba ki bat bor ia katei ka khynnah skul.

Katei ka khynnah, ka iathuh ha ki pulit, ba u kpa jongka, ula bat bor ia ka, naduh ka por, ba dang leit Class 6 bad hadien kata, ula iai leh ia katei ka kam beain. Ym tang katta, ka iathuh ba u kpa jongka, u ju iawer ia kiwei pat ki paralok jongu, ban iakren kam ha iing, hynrei, ula ailad ia kitei kiwei ruh, ba kin bat bor ia ka.

Katei ka khynnah, ka kynnoh ia U Tilak Yadav, district president ka Samajwadi Party, lai ngut ki para jongu bad nangta sa U President ka BSP ha katei ka jaka, U Deepak Ahirvar, U vice-president ka BSP, U Neeraj Tiwari bad nangta sa kiba ha iing jongka, kiba don bynta ha katei ka kam bat bor ia ka.

Katei ka khynnah rit, ka iathuh ba u kpa jongka, ula byrngem ban pyniap noh ia ka kmie jongka, lada ka iathuh ia katei ka jingjia sha kiwei pat.

Ki pulit ka Lalitpur, ki la shimti ban tohkit ia ki 28ngut ki briew bad la iathuh ba katei ka khynnah, kam pat don ha ka rta ban ioh briew bad kumta, ka jingtohkit, ka dang iaid halor katei ka jingjia, ong U U Girijesh Kumar, ASP ka Lalitpur.