Dei ban iaid shakhmat, ban pyn kynriah ia kiba sah ha Them Iew Mawlong, ong U bah Adelbert

Shillong: U MLA ka North Shillong u bah Adelbert Nongrum u la ong ba ka sorkar Meghalaya Democratic Alliance (MDA) ka dei ban iaid shakhmat halor ka jingpynkynriah noh ia ki briew kiba sah ha Them iew Mawlong da kaba ong “Ka sorkar ka dei ban iaid shakhmat, namar ba ka sorkar ka khlem leh da ka bor ban kyndang ia kine ki briew basah ha kane ka jaka, hynrei ka shu pynkynriah ia ki sha kiwei pat ki jaka, na ka bynta ka jingshong suk shong shngain bad namar ba kane ka jaka ruh ka donkam ban pynbha.

Haba ia kren bad ki lad pathai khubor u bah Adelbert u la ong ba wat la u dei u MLA jong kane ka thain, hynrei na ka liang ka sorkar, ka khlem kwah ban kynthup lang ha ka High Level Commitee (HLC),ha kaba um don jing tip ba kaei ka ba don shalyndet, hynrei ha ba ka sorkar ka la shim ia ka rai ban pynkynriah noh ia ki harijan na ka Themiewmawlong u long u ba kloi ban kyrshan ia ka ta.

U la ong ruh ba ka jingkhang ia ka ne ka surok ha Them iew Mawlong ka la wan rah ia ka jingeh ia ki ba bun namar ba ka jingkhapngiah palat ki surok ha kaba lada lah ban pynkynriah ia ki na ka ne ka jaka kan ia rap shibun ia ki paidbah ki ba donkam ban iaid lyngba na ka ne ka jaka. U la ong ruh ba ki bor na sha lyndet kim dei ban tuklar ia ka ne ka bynta namar ba ka dei ka ba la leh da ka sorkar jylla Meghalaya ka ba don jingthmu ban leh ia kaba bha eh, namar ba kane ka dei ka mat ka ba la sahteng la slem bad mynta ka por ka la dei ba ka sorkar kan shim khia bha ia ka ne ka mat namar ba kum ba ka paw ba ki la kam ba ki don ia ki kot ki sla na u Syiem wat la kam lah ban sei ia kine ki kot ki sla ka lah ban don eiei sha lyndet bad nga sngew ba ka sorkar ka dei ban iaid shakhmat ia kane ka bynta.

U la ong ruh ba na ka liang ka sorkar kam dei ban leh politik ia ka ne ka bynta namar ba kum ba na ka liang ka sorkar ka la dep pynpaw ha ingdorbar thawain ba kim lah ban ia kren ia ne kane ka bynta namar ba ka case ka dang don ha High Court.U la pynpaw ruh ia ka jinglyngngoh da kaba ong “Hapdeng kum kane ka por ha ba ka sorkar ka la pynmih ia kane ka jingbthah ha kaba ym don nong tip ba haduh katno na ka liang ka sorkar ka don ka mon ban leh ia kane lane ioh ka dei tang ka jingpynthame ia ki paidbah namar ka ne ka election shiteng samoi”.

U la bynrap ruh “Lehse ioh ka dei tang ka jingpynthame ia u paidbah namar kane ka election shiteng samoi namar ka ne ka election kan ktah bha ia ki ba don ha ka sorkar ka ba la ialam da ka NPP halor ki ba bun ki mat ki ba ka sorkar ka khlem pyntrei bha,lehse ioh ka shu pynmih ia ka ne ka rai ban da rap jot ia ki ba bun ki mat ki pynmih ia ka ne ka wei kamat ban pynpaw ba ka sorkar MDA ka la shim khia, hynrei haba ki la shim khia ki la dei ban pyndep syndon ym tang ban shu ialam bakla ia u paidbah ym tang ban pynangnud kai ia u paidbah namar kane ka dei ka mat ka ba la sah teng la slem“.

U la ong ruh “Lada ka case ka dang don ha Court nga kyrmen skhem ba ka Court ruh kan ai ka rai ha ka liang jong ka sorkar Meghalaya namar ba ka sorkar ka thmu ban ai ka jaka sah ka ba kham bha ia kine ki briew ba sah ha ka ne ka jaka. Na ka liang jong ngi ngim don ka jing isih ia ki, ne kyntait ia kine ki jait bynriew harijan, namar ba ki dei shi bynta bad ka jylla Meghalaya namar ba naduh kulong kumah, ki la ai ka jingshakri bad ki la don ha kane ka jaka hynrei ka jingkwah jong ka sorkar ka long tang ban pynkynriah ia ki sha kawei ka jaka ba kham bha bad ban ioh pynbha ia ka ne ka jaka”.