U Mukul Sangma, um dei ban klet ia ki jinglehbha jong ka seng Congress, ong ka kong Ampareen

Shillong:Ka jingiahuri hura hapoh ka seng Congress ka la paw shynna shabar, hadien ba u Dr Mukul Sangma u la pynpaw ba um sngewiahap ia ka jingthung President bathymmai jong ka Meghalaya Pradesh Congress Committee(MPCC) da u Bah Vincent H Pala bad dei namar kane ka daw kaba la pynlong ia ka seng Congress ba kan don ka jingpait jingpra hapdeng jong ki.

Haba kren halor kane ka bynta na ka liang ka Dr Ampareen M Lyngdoh kaba dei ka MLA jong ka seng Congress na East Shillong Constituency ka la ong ba u Dr Mukul Sangma u ba la ioh ia ka shuki Myntri Rangbah ka jylla ba la ailad bad ai sbun mynsiem da ka seng Congress bad um dei shuh satia ban dang rhah bor, hynrei u la dei ban ailad pat sa ia kiwei katkum ka jingmon jong ka seng Congress.

Haba kren sha ki lad pathai khubor ha ka 11 tarik u bnai Risaw 2021, ka Dr Ampareen M Lyngdoh ka la ong ba kam pat kwah ban kren eiei halor kane namar kata ka jingiakren ka dang don hapoh ka seng bad ynda ka seng ka la dep ban ia kren pynbeit halor kane ka jinghuri hura bad kylli markhmat na u Dr Mukul Sangma, ka seng Congress kan sa iakren pat hadien kata namar ka Congress kam dei tang jong kawei ka ïing hynrei ka dei jong u paidbah baroh bad ka la ong ba da lei da lei ka seng Congress kan nym shah satia ba mano mano ban wan thombor ia ki napoh ban pynjot bad uno uno u ba kwah ban mih na ka seng, ka seng kan nym lah ban bat ia ki. Ka Kong Ampareen ka la ong ba ka jingleit jong u Dr Mukul Sangma ka dei lehse ba u sngew ba u don katto katne ki kam kiba u hap iakren namar u sngew ba ka seng Congress ka khlem shim lem ia ka jingsngew ka jong u. Shuh shuh ka la ong ba ki kynrum ki kynram ki ju don beit hi ha man la ki seng saiñ pyrthei ym tang ha ka seng Congress bad ka jingshah kynthoh bha jong ka seng Congress ka dei namar ba ki nongialam ki biang bha.

Ka Kong Ampareen ka la ong ruh ba lada u Dr Mukul Sangma u ieid hok ia ka seng u dei ban shing bad ban sngap lang bad um dei satia ban klet ia ka jingleh bha jong ka seng Congress ban ailad ia u ba un long u Myntri Rangbah bad u nongialam hapoh ka ïing dorbar thawaiñ ka jylla bad lada u dang klet ia kita u dei u briew shimet u ba kwah tang ka jingmyntoi shimet jong lade.