Pyrshah ka RBYF ia ka jingweng ia ka Section 5 ka VAB

Shillong, 02 Jylliew:
Ka Ri-Bhoi Youth Federation (RBYF)  ka la dawa ba ka KHADC ka dei ban phah sha u Lat ka jylla da ka Village Administration Bill kaba rim khlem da pynkylla ia ki kyndon ba kongsan kum ka Section 5 jong kane ka Bill.
Hapoh ka jingialam u President u Bah B P Thangkhiew ka la kyrpad ia ka tnat District Council Affairs (DCA) ba ka dei ban kynthup biang ia ki kyndon ka VAB kiba ka People’s Democratic Forum (PDF) kaba la shah pyndam noh na ka jingpynkhreh kaba rim jong ka VAB 2014.
“Hadien ba ngi la iakynduh ia u CEM ka KHADC mynta ka sngi, ngi la sngewthuh ba ia ka sub-section 8 hynrei kaei kaba ngi sngewpyrshah eh ka long ia ka jingweng ia ka sub-section 16 kaba kren shaphang ka jingwan buhai Shnong jong kiba nabar bad ki jingpyrkhing ia ki,” ong u Bah Thangkhiew haba kren sha ki nongthoh khubor hynne ka sngi Balang ha Shillong.
U la ong ruh ba ka seng kam don eiei ban ong ia kiwei pat ki jingpynkylla halor katei ka VAB, hynrei tang ia ka bynta kaba 5 jong ka bynta kaba 16 (sub-section 16) ym dei satia ban weng noh ia ka.
U la ong ba ka RBYF ka kyrshan ia ka jingpyndam noh ia ka section 5, sub-section 8 hynrei ka seng ka pyrshah ia ka jingpyndam ia ka sub-section 16  namar wat ia ka riti synshar ka ri ruh ka la ai lad ba dei ban buh ki kyndon ia ka jingrung jingmih kiwei pat kiba nabar kaba la kdew shai hapoh ka Article 19, sub clause no. 5.
U la ong ba dei ban pynrung beit ia katei ka sub-section 16 jong ka section 5 hapoh ka VAB bad ka seng ka  kyrshan ia ka jingshim rai ka Dorbar bah ka Bri u Hynniewtrep.