Kynduh jingeh ki 3 shnong ba sniew jubor ka surok

Jowai, 2 Jylliew:
Ki lai tylli ki shnong ka Amsyrwai, ka Amralang bad ka Pdeng karong ki ia kynduh shi bun ki jingeh ha kine ki sngi khamtam ha ka leit ka wan ka kit ka bah namar ba ka surok na Amlarem sha ki ne ki lai tylli ki shnong ka la sinew jubor shaba palat. Katei ka surok na Amlarem sha ka Shnong  Pdengkarong ka jngai tang 8 kilomitar.
Katei ka surok kaba la 50 snem mynta kam pat ioh surok rong haduh mynta ruh, watla kitei ki lai shnong ki la ju leit ud sha ki bor sorkar na ka por sha ka por bad kumjuh ruh sha ki nongmihkhmat,u Ma Kelman Pohchna President Synjuk ki Rangbah Shnong War Jaintia u ba dei na ka shnong Pdengshakap u la ong ba kane ka dei ka surok PWD ka ba mynta la 50 snem tam hynrei kam treh ban siang song ia ka bad ruh ban shna ia ki na la khnang ba ka um kan ioh ban iaid la ka jong ka lynti ym nalor surok. U la ong ba ka jingtuid um ha surok khamtam ha kine ki sngi ba jur slap ka la pynjulor ia katei ka surok, n aka liang ka jong u kum u Rangbah shnong barim ka shnong pdengshakap u kyrpad ia ka bor sorkar ba kan peti ia ki jingeh jong ki da kaba  pynshna bha ne maramot noh ia katei ka surok.